Konaakoneni ovakongi voilonga

0
240

 

EENHANA – Opolifi yoshitukulwa shaHangwena otai konaakona oshikoya sheteyo leumbo komufekelwa e ya ta kongo oilonga.

Shisante Kaume Itumba okwa lombwele oshifo Kundana kutya, omukwashiwana waAngola, Natangwe Haundjodjo okwe ya okukonga oilonga mooLazarus Shimutwikeni pOnekwaya yokoushilo petameko laKotoba, neudo ndele nani ina endela oilonga paushili.

Molwomhumbwe yomunailonga meumbo naashi a fatulula a dilila keumbo lomupambele e li momukunda Onekwaya,ooShimutwikeni ove mu tambula a tameke oilonga pehovelo lohani ei.

Omufekelwa a li meumbo pamwe novanailonga tava tungu, konima yomafiku avali eshi a tameka oilonga okwa ngwala po omuvelo wokuya mongulu, ta hadaula meenduda adishe fiyo omonduda yokunangala omo a kufa ooN$ 2 800.00 neeCellphona nhatu.

Shisante Itumba ta twikile ko kutya, omufekelwa okwa faduka po nomaliko aa fiyo okeumbo lavo kEnoleu  omukunda u li popepi neengaba daAngola naNamibia.

Ashike pakwafelo lomupambele ou pamwe nopolifi yaNamibia noyaAngola, okwa shikulwa kEnoleu, opo a hangika ye ta kendabala okufadukapo  ndele opolifi eshi ya ya monduda yaye oya hangamo oilandomwa ipe ihapu noCellphona imwe oyo a kufa kaandja Shimtwikeni.

Itumba ta weda po kutya, omunailonga ou a li a fufya ovaneumbo kutya oku na eedula 17, mondjato yaye omwa hangika okakalata ketunhilo koMeasels-Rubella loneudo ka holola kutya oku na eedula 21.

Opolifi otai kunghilile ovayandji voilonga va ninge omakonaakono komunhu keshe va hala okukuta moilonga, va shiivafane novakwapata vavo naaku hava di, va kwashilipaleke kombinga yeedokumente davo, shi pupalele opolifi ngee tai lopotelwa oiningwanima yoludi eli.

Itumba okwa weda po kutya oshikando oshitivali mefimbo lixupi oshiningwanima sholudi eli tashi ningwa moshitukulwa shaHangwena.

LEAVE A REPLY

Please enter your comment!
Please enter your name here