NFA mOshana a yemata kokapale kaShakati

0
182

 

OSHAKATI-Onkalo yokapale kaShakati oya kenyaneka aawiliki yokatanga kokoompadhi moShana, sho okapale hoka oko awike, yina yomaudhano moNooli ke li monkalo ombwiinayi.

Sam Nekwaya ngoka eli omukalelipo gwoNFA mOshana okwa holola ndhika komeho guudhano wekopi lyoSpur ndyoka ta li dhanwa ongula yanakwasha pokapale oko tuu hoka keli monkalo yaa li nawa nande.

Nekwaya okwa ti ye ongomuwiliki gwetanga nomuholi gwomaudhano, okapale kaShakati oke mu lulumika oshoka ka keli nando monkalo yi shi okwi idhidhimikilwa.

Okwa ti onkalo moka okapale haka ta ki iyadha otayi sitha uunye nota yi shunitha omaudhano monima miitopolwa yokoNooli.

Okwa ti otaya longitha okapale haka shiikwatelela keyeletumbulo ekulu lyoshiwambo “Nekwa lyatsima oye ngaa nyoko” ta ti ka yena nkene oshoka okapale haka oko a keke keli moNooli.

Okwa li wo a holola eyeme kombinga yokapale kopUukwangula hoka nako  kafa ihaa ka silwa we oshimpwiyu nawa ta ti ngele okapale haka nako ota ka ethelwa ngaashi haka kaShakati nena otatu hindi uupyakadhi manga uudhigu tawu ya.

Okapale kaShakati hoka keli kohi yUuministeli waanyasha nomaudhano onkene ta ka tsikile noku nayipala nopauyelele mboka twapewa konzo yi li popepi nokapale haka ota wu ti okangwena kokapale haka oka ninga oomwedhi ngashingeyi dha thika lwopomugwoyi inaa ka tekelwa.

Omunambelewa ngoka inaa hala edhina lye lya pita moshifo okwa li a hololele Kundana kutya eshina lyokupomba omeya mokanala hoka kadhingoloka Oshakati kaza koRuacana olya teka.

Ta holola kutya oya li ya gandja iilonga kehangano lyontumba ndyoka lya li lya mbestele eshina, ashike olya li lya kongo eshina lyapuka onkene eshina ndika oya li ye li shunitha ko hoka ye li landele.

Nopokati mpoka osipana yoYoung Chiefs oya li ya kambadhala yi tekele okangwena netoloko ashike shika inashi kwatha sha.

Okapale haka oka pumbwa esiloshimpwiyu lya kwata miiti nongele hasho nena otwa tegelela onakuyiwa yuudhano miitopolwa yokoNooli yi kale ya shuna pevi.

 

 

LEAVE A REPLY

Please enter your comment!
Please enter your name here