Omukainhu eheshivike a fiila omukulupe (99) ohanana

0
403
Efano eli ola longifwa ashike onga oshiholelwa, ashike ou haye meekulu Selma Kamunda

ONANONA – Ovakanedimo vomukulupe womido 99 momukunda Onanona moshikandjohoololo shaEenhana moshitukulwa shaHangwena, Olomakaya ladjako ova fiwa vehena oitya eshi a fininikilwa ohanana yeemwedi omuwoi vehe i shii nale.

Oshiningwanima shihalula osha fiya ofamili ya meekulu Selma Kamunda ofika eshi ina yokaana kokamati keemwedi omuwoi e mu etela okaana tati okwa dalwa komutekulululwa.

Eshi she va kumwifa unene oshesho okaana vati ka etwa kehe na nande okakalata koshipangelo, ile odjapo yedalo oyo ta i ulike kutya oko naana lyelye novakulunhu vako oolye.

Omolwa oshiningwanima eshi ovakwapata vameekulu Kamunda ova tokola opo va lopotele opolifi kEenhana, nomukainhu ou paife okuliwe mokashoko kopolifi.

Pahokololo laMartha Mwandingi, omunailonga meumbo lomukulupe Selma Kamunda mOnanona, ova hangwa ombaadilila meumbo ku ina yohanana ei oo a shivika ashike nedina Simaneka.

Simaneka ou okwa li a enda pamwe nomukulupe vati a dja pOshigambo, vati omushivikile womukulupe Kamunda.

Simaneka vati okwa hokololela ovaneumbo lomukulupe kutya xe yokaana kaye oPaulus Itoolwa, omutekulululwa wameekulu Kamunda. Vati shaashi kali eshi kutya ovakwapata vaItoolwa oveli peni, okwa tokola opo a twale okaana oko keumbo lomukulupe wokOshigambo oo a uda kutya okwa pamba Itoolwa.

Omukulupe oo wopOshigambo, edina laye ina li tumbulwa vati okwa tokola opo a findikile Simaneka nomona keumbo lomukulupe Kamunda, shaashi vati ye haye lela inakulu yaItoolwa mekoto.

Vati omukainhu ou okwa hokolola kutya okwa hala a ka konge oilonga shaashi xe yokaana vati ihe kape sha.

Vati ofamili yaKamunda ina i uda nale kutya Itoolwa okuna okaana ile pamwe oku na nande omukainhu ena eteelelo laye. Itoolwa naye mwene vati eshi a pulwa okwa ti ina etelwa nale edimo komukainhu oo.

Mwandingi nomukulupe Kamunda ova kendabala ngeno okupulalaapula Simaneka ashike vati okwa li a handuka ta ti okaana otake mu imbi oilonga, te ka tenheke poshi nokuya e ka fiya po ashike nodikwa, kehe na okakalata ile ondjapo yedalo, ominambo ile oikulya.

Eyayi lako ola ka tumwa nonhumwa komatango efiku olo.

Mwandingi okwa weda po kutya, ova pula omayele poushiinda, kovapambele ve li keenhele da yooloka va tale eshi tava ningi po. Ova dengela opolifi yaEenhana ei ya pula Mwandingi a twale okaana kEenhana, lao linene umwe a hombolwa mepata omo e li kodoolopa yaNdangwa okwa kufa po ohanana oyo eke yi tekule pamufyuululwakalo.

Omunambelewa omupopiliko wopolifi yoshitukulwa shaHangwena Shisante Kaume Itumba okwa koleka ehokololo eli, a ti opolifi oye lipyakidila noku konaakona noku konga Simaneka ou e he shiivike apa a yuka.

 

 Efano eli ola longifwa ashike onga oshiholelwa, ashike ou haye meekulu Selma Kamunda

LEAVE A REPLY

Please enter your comment!
Please enter your name here