Oshikukumungu shovalongi okwali ngaho shi na oku efwa shiye ngaho kokule?

0
213

Oshikumungu pokati kepangelo novahongifikola shina sha neewedelo leendjabi osha ya unene kokule, ashike okwali tashi dulika okuyandwa.

Molwa onghalo yoshikumungu eshi, kutya nee ngeno oshidjemo shohofa oshikale sha fa peni ndele ounona tava shuna kofikola nena, oshili oyoyo kutya elongo lounona ola piyaanekwa nale noshikumungu eshi oshina oku kala shi na mo olunyala moshidjemo shiheli nawa shekonaakono olo mongaha lili metifa.

Oshinima eshi okwali shina oku kwatwa nawa petameko eshi ovalongi va tameke okupopya ekangha, ashike osha efelwa fiyo tashi ya ponghatu ii.

Pa ku tala, eembinga mbali odo tadi lu, kapena naana umwe a hala a ulike ouvaya. Keshe umwe okwa hala a ulike eenghono daye. Osho ina shi puka nande nande shaashi ovalongi ovena oufemba ve u pewa kekotamhango, okuholola omadilaadilo, nokupula osho ve wete kutya osho ondjabi ili mondjila. Epangelo nalo oli li ashike mondjila ngee tali ti kape na oshimaliwa shokufuta ovahongi, nava teelele. Sho nee shili ngee omunhu kena oshimaliwa nande ou mukondjife, kuna nghee.

Ashike nee monghalo ei, eembinga adishe mbali oda li ashike dina okukundafana ndele tadi hange efikilo petameko.

Mongaha eshi ovahongi nepangelo (eembinga adishe mbali dina eenghono) tava lu, ovanhu,  ile ounona ovo tava mono oixuna shaashi ovo veli momakonaakono.

Ovadali vounona ovo navo natango ove li yoo momalimbililo shaashi onakwiiwa younona vavo oi li moshiponga. Dilaadila omudali a kala ta nyange oule wodula aishe opo okaana kaye ka ye kofikola, ta futu nekonaakono, ndele pexulilo lodula omulongi ota tula mo ekangha, ile ota tameke ta popi kutya ota i mekangha pefimbo lekonaakono.

Nande nee ounona ova ka mone omhito yokunyola, ka shi na nee kutya efimbo lilipi, kutya nee oleli la li la tulwa po kepangelo, ile pamwe okonima yekangha, ounona itave li hongo vali nawa. Shaashi mopaife oveli monghalo omo vehe shi ngeenge otava nyola ekonaakono ile ahawe, nave li honge, ile ahawe.

Nomomhito oyo ounona ava va kwatwa koshinima eshi unene nove li monghuwo ina onghambe, opamwe novakulunhu vavo, kave na mo nande ewi lasha moshinima omu. Pamwe va yandje omaliudo avo, nomawedelepo, shaashi ota shi dulika kwali vena omadilaadilo taa dulu okulandulwa mekandulepo lomukundu ou. Sha hala kutya eenghundafana pokati kaNantu nepangelo ota di ende okuulu kamukwendje shaashi ombinga imwe oyo nayo ili oshitukulwa sha fimana melongo ina i kalelwa po.

Osha yuka shili oku yambidida omadilaadilo a umwe womovaleli voshilongo oo a ti onghalo yokuhena ovakelelipo vovadali nounona mefimbo lekangha eli, ota i ulike kutya opena omhumbwe yakula okutota omahangano, ehefi opa politika, limwe tali kalele po ovadali, nalikwao ota li kalele po ounona vofikola.

Vamwe otava ti ounona ove lilwe po koNanso, ashike eshi kashifi naana shoshili shaashi oNanso oya tala unene konghalo yovanafikola vokoiputudilo yopombada, yo vali oya nyama kopolitika. Ounona voo vene-vene ovo va pumbwa ehangano lavo omo tava kala vena ovakaleli po vavo okuva popila.

Ovakulunhu navo ova pumbwa okutunga po ehangano lavo omo tava kala tava popi oinima oyo ya pamba elongo lounona vavo. Eefikola dayooloka ohadi kala dina omaupyakadi, ashike ovadali kavena omhito yokuya pamwe va kundafane elongo lounona.

 

LEAVE A REPLY

Please enter your comment!
Please enter your name here