Oshipundi Onamutenya sha mona mwene

0
208

 

ONIIMWANDI – Elelo lyopamuthigululwakalo lyaNdonga olyali lya ulike Tatekulu Pineas Ashimbuli oye ninge omuwiliki nomukwateli komeho gwiilonga yoshipundi shuulenga Onamutenya.

Ashimbuli okwa ulikwa a landule ngoka a li ta wilike oshipundi shika Samuel Nepolo ngoka a manene oondjenda dhe omumvo gwa ziko. Ashimbuli oye wo ta wilike omukunda Enkolo.

Oshituthi langeko she osha li sha ningwa omasiku ga ziko sha ningilwa pegumbo lye pEnkolo. Elenga enene moshikandjo Oniimwandi Naeman Amalwa oye a li a kwatele komeho elangeko ndyoka.

Esiku lyelangeko ndyoka aanamukunda oshowo aantu yopomidhingoloko dhopuushiinda oyali ya gongala noku taambako omuleli ngoka.

Amalwa okwa pula Ashimbuli a kale omuleli omwaanawa, ye a fatulule noku yelithila aakwashigwana ooveta noompango dhelelo lyopamuthigululwakalo gwaNdonga.

Elenga enene olya pula woo mwene gomukunda ngoka a kale ha longele kumwe naanamukunda gwe, ye a kwashilipaleke kutya ombili oya kalekwapo negameno, niimbuluma oya kalekwa kokule momikunda ndhoka.

Amalwa okwa ti elelo lyopamuthigululwakalo otali kala lya langeka ooyene yomikunda ndhoka inaadhi langekwa, yo iilonga yomikunda yi kale ya yamo. Okwa kunkilile mwene gomukunda a kale a gandja oompango dhopamuthigulululwakalo, ye a kale ena ookomitiye ndhoka tadhi kwatele iilonga yomukunda ngoka komeho.

Ashimbuli okwali a taambako oshilonga shoka a inekelelwa nomaako ga shambekela, ta uvaneke taka longa ngaashi shu uthwa. “Otandi taambako oshinakugwanithwa shika montaneho yaantu ayehe, notandi uvaneke tandi ka longa nuuyuuki, omuntu iha yela ngeyi ashike otandi ka kambadhala ngaashi tandi vulu opo ndi humithe komeho omukunda nguka,” Ashimbuli ta ti.

Okwa pula aanamukunda ye ya longele kumwe, ta ti aluhe ngele omukunda oguna elongelo kumwe ayihe ohayi ende nawa no hayi kala yili kolutenda. Okwa pula woo aavali ya longe aanona esimaneko, yo ye ya longe woo kombinga yomalelo gopamuthigululwakalo, noku yanda iinima mbyoka inaayi opala moshigwana, ya kale aluhe haya ningi iinima mbyoka tayi tungu yo yi iyageke okulonga iilonga iiwinayi mbyoka tayi teyapo oshigwana.

 

 

 

LEAVE A REPLY

Please enter your comment!
Please enter your name here