Oshituthi shoshipe ehulilo shiwike ndika

0
179

OMUTHIYA – Ombelewa yomithigululwako noonkuluhedhi kohi yuuministeli welongo  moshitopolwa shaShikoto pamwe nuuministeli wUunamapya, omeya nomaluhwa oya thaneka natango opo nuumvo ku ka dhanwe nokutyapulwa oshituthi shOshipe. Oshituthi shika ohashi dhanwa pamuthigululwakalo omumvo kehe.

Oshituthi shika otashi ka dhanwa Etitano lyoshiwike shika, tashi dhanenwa pegumbo lya tatekulu Mateus Itana, momukunda Onakankunzi moshikandjohogololo shaMuthiya moshitopolwa Oshikoto.

Omunambelewa omukuluntu gopakathimbo muuministeli welongo koshikondo Shoonkuluhedhi nomithigululwakalo

Paulina Muulila okwa yelitha kutya oshituthi shika ohashi longekidhwa omumvo kehe, mono aantu haya hangana nokuya pamwe yo taya tyapula Oshipe, konima aantu ya mana okuyungula, osho wo okupungula.

“Elalakano lyoshituthi shika okukalekapo oonkuluhedhi nomithigululwakalo, oshoka opuna omithigululwakalo ndhoka hadhi gumwa naandhoka ihaadhi gumwa, oshituthi shika otashi lalakanene woo okumangela kumwe aantu, osho wo oku eta uukumwe wa kola wopamuthigululwakalo.

Uuministeli welongo otawu ka ulika omathano giihongomwa yopamuthigululwakalo, oshowo uuministeli wUunamapya otawu ka ulika oombuto,  niilongitho yomomapya mbyoka yopamuthigululwakalo oshowo yopashinanena, osikola Olupale oya tegelelwa yika ulike woo nkene oshipe sha kala hashi dhanwa monale.

Okwa tegelelwa poshituthi shika pu ka kale ngoloneya goshitopolwa shaShikoto Henock Kankoshi, aakwanepangelo ya yooloka, aanambelewa yomithigululwakalo yaza koombelewa dha yooloka, naangoka taka gandja etumwalaka lyesiku oSem Shikongo gokombelewa yiithitukuti kohi yuuministeli womidhingoloko nomatalelepo moshilongo.

Oshituthi shika shonuumvo otashi dhanwa kohi yoshipalanyolo “ Shekupe Muthithi taamba, Kalunga kaNangombe Shambekela, otapu kala omauliko giilikolomwa, oshowo nkene aantu haya tyapula nokudhana oshipe pamuthigululwakalo. Onkee otaku kunkililwa opo aakwashigwana ayehe ya kale ya holoka, yo ya kalekepo oonkuluhedhi nomithigululwakalo, dhi kale dhina omwenyo.

Muulila okwa ti otaku ka ikundwa woo omithigululwakalo, no ta ti oshituthi shika shonuumvo otashi kala shopandjokonona. Ta gwedhapo kutya otashi kala tashi dhanwa omumvo kehe ngaashi naana hashi ningwa shito, nokutumbaleka aakulu yonale.

Ta pula aavali ya ete aanona, osho wo oosikola dhi tume aalongwa ya ka tale nkene oshipe hashi dhanwa pamuthigululwakalo, noku tala woo iihongomwa niilikolwamo yopamuthigululwakalo.

 

 

 

LEAVE A REPLY

Please enter your comment!
Please enter your name here