PLAN etanga lyaakwiita aa iyambi: Evi ndyoka oyendji ya sile olili peni?

0
168

Epulo ndika olya piyagana, hasho?Otashi vulika shi ikwatelela ku nkene omuntu we li talako. Ngame paungame kandi  li nine eyamukulo, ndele opo pu kale okulonga puuyelele, opena okukala gumwe eli nine eyamukulo. Ekondjelomanguluko lyetu kalya li ashike lyoku yelutha epandela lyoshigwana nemanguluko. Otwa kondjo opo tu galulilwe emanguluko , ondhilo , nuuthemba woku kala nevi osho wo oku mona uuwanawa mulyo. Otwa kondjo tu manguluke oku mwenya pamuthika gwongushu yetu naashoka shasimana otu tyapule iiyimati yemanguluko. Ngashingeyi epulo oondika kutya yangapi yomwaamboka ya kondjele emanguluko lyoshilongo shika ya likola evi?

Kandina uumbangi wopamiyalu oku ulika kutya aantu yangapi ye na evi  ndyoka lya kondjelwa kaakondjelimanguluko omayovi. Noyendji yomwaambaka oya kanitha oomwenyo dhawo miita mbika okukondjela evi. Ihe shoka sho shili ooshika kutya oyendji yaamboka ya kondjele evi ina ye li mona  natango. Omolwashike? Ombili engungumano nedhiminathanepo olyo lya tulwa komeho kombanda yombinzi ndjoka  aakondjelimanguluko ya tilehi opo ya pale ondjila yaNamibia okuya kondiimpangela.

Ondi shishi kutya  omwaalu omushona gwaamboka ya li aakwiita yemanguluko  oyi imonene evi unene tuu mboka ya mono oonzo  dhokulanditha oyi ilandele oofaalama niipambu yevi. Ihe oyendji yomaakondjelimanguluko naamboka ya kala konima yesiga pethimbo lyuukoloni natango kayena evi.Oye li monkalo ndjika medhina lyomulandu gwedhiminathanepo,ombili, engungumano  noshikwawo;ekotampango ndyoka lya gama kombinga yuukapitali. Nonando Ekotampango olya simanekwa muuyuni auhe, ndika olya  tula epangelo monkalo ondhigu kombinga yoku vula kwalyo  oku longa noshikumungu shevi.Omalunduluko meopalekululo lyevi ngoka ga tamekele 2006 oga etapo ashike elunduluko eshona okushonopeka ondjala yokukala nevi mokati koshigwana.

Otandi popi kutya evi ndyoka tse twa kala tatu kondjele pomimvo dhuugundjuka wetu inali galulilwa natango kooyene yalyo yomondjila mboka ya kala ya ningililwamo. Onkene shaangoka ta dhiladhila kutya otwa manguluko nopwaana eshunitho lyevi kaaNamibia mboka ya kala ya thiminikwa oku li moshiponga shoku ka kala itaa pulakenwa monakuyiwa.

Evi olyo lya li oshinenenima mekondjelo lyemanguluko onkene ngele okwa ndopiwa okuli shunitha kooyene yalyo , shika otashi vulika shi ka hulile morevolusi onkwawo yi na sha ashike nuumwene wevi.Oshoka aantu oya pumbwa evi opo ya vule okuhwepopeka oonkalamwenyo dhawo. Onkene omulandu gwomulandithi a hala nomulandi a hala ngoka hagu longithwa kepangelo okulanda evi ogwa pumbwa okutalululwa oshoka nguka inagu longa nawa moku kuthapo ondjala yevi mokati kaathiminikwa nale pethimbo lyuukoloni. Oshikwawo mboka ye na oshinakugwanithwa shoku longa nevi kutya oku li landa nenge oku li gandja, oya pumbwa okulonga neendelelo oku ungaunga naashika oshoka ethimbo otali endelele. Onkambadhala okugalulako evi miikaha yaamboka ye li na itayi ka longa sha ngele ita pa katukwa oonkatu meendelelo opo oshikumungu shika shi monenwe eyamukulo lili nawa nota li opalele ayehe mboka ya gandja oomwenyo dhawo mokukondjela emanguluko lyoshilongo shika.

Omapendafule

Iita yemanguluko lya Namibia oyi na uukwatya weigandjo lyopombanda osho wo eitulomo moshilalakanenwe shoku tokola  omalyenge guukoloni.Omolwashika moshilongo omuna oombila dhaakwiita yoPLAN omayovi mboka ya sila oshilongo shika inaadhi ndhindhilikwa no inadhi tseyika, na osha fa tapa endwa kashona okukonga oombila ndhika momakuti noomiiheke yoshilongo shOmapenda.

Omolwashike konima yomimvo 23 dhemanguluko, ku shiwike  ashike oombila nenge omahala mpoka pwa fumvikwa aakwiita yoPLAN noku tula omahala ngoka momalugumbo nenge okutula ko omamanya gokoombila?Otwa ninga oshigwana shaantu mboka yaana esimaneko lyaa mboka ya gandja oomwenyo dhawo iikulilambinzi, nenge omolwashike tapa longwa ashike kashona oku opaleka omaendo gaamboka yi igandjele ekondjelomanguluko ,mboka ye shi ningi tashi vulika opo tse tu kale momwenyo paa ndjodhi dhetu.

Ondi shishi aakwashigwana yamwe mboka yena omadhiladhilo ga kotoka itaya kala ya hala oku uva “omadhiladhilo guushuni monima ngaka” na otashi vulika nookuli ya kale inaa ya hala oku kwatakanithwa noshitopolwa shondjokonona shika. Yamwe yomaakwashigwana yetu  otaya kala ashike ya tokola  opo yaa leshe edhiladhilo ndyoka molwashoka iimaliwa itayi vulu okuhepekwa mokulongithwa moopoloyeka itaadhi etapo sha.Yangapi yomaakwashigwana aakiintu naalumentu ye na edhiladhilo ndika? Ngiika oyendji , ihe ngame kandishishi. Ihe  ino dhimbwa okutala konima.!

Shitiwa otwa koneke noku ndhindhilika kutya omahala ndhimbulutho miitopolwa yokuushayi ogo owala ga dhikilwa aakwiita mboka ya sila mekondjo.Oshoshili kutya pethimbo lyekondjelomanguluko katwa li naakwiita mboka ya tuminwe kiilonga iidhigu ihaa ku galukiwa, nenge omolwashike sigo oompaka inaapa dhikwa nando ehongwafano  limwe lya gumwe gwomwaamboka.

Yamwe yo mu tse mboka twa enda noku talelapo iilongo kombanda yomafuta mbyoka wo ya li miita ngaashi tse, otwa mona iihongwathano ya dhikwa miilongo mbyoka moku simaneka aakwiita omapenda mboka muupenda wawo ya longa noku gwanithapo shoka yo ya li ya tumwa ya ka longe. Iilonga yimwe mbyoka oye ya fala sigo omeso nookuli. Oondhimbulukothano ndhoka odha dhikwapo oku ya simaneka osho wo oku ya yalula omolweigandjo lyawo moku gamena iilongo yawo opo yaa ponokelwe noku yugwako  kaatondi yawo.

Ngashingeyi epulo olili mpaka kutya uunake tatu ka simaneka omapenda getu  oohandimwe mboka ya longo nokwi idhimbwa yoyene opo ya longe iilonga mbyoka ya tumwa okulonga   ye shi ningi omolwohole yoshilongo naantu yamo.

Ndika eshongo kwaa mboka yi ilongekidha okupulakena. Tse yamwe otwa dhiladhila kutya aakwiita yoPLAN nookommanda ndhoka dhina omwenyo nadhi pulwe opo dhi ulike aakwiita yoPLAN mboka yi igandjela oshilongo shawo molwohole yasho. Ngame ondi itaala kutya  katuna aakwiita yomwaalu ogundji mongundu ndjika. Oyendji yaakwiita yoPLAN oya sile miita yomiihwa momalugodhi naatondi yawo, onkene otuna oku tokola pauyuuki noku gandja esimaneko kaakwiita aashona mboka ya zimine oku igandjela oshilongo shawo opo yeshi etele emanguluko . Ngele otuna omadhina gaakwiita mbaka yomongundu ndjika natu ya dhikileni oondhimbulutho hala dhe ya nuninwa.

Omahala ngaka otaga kala ondjokonona ombwaanawa okulonga oshigwana shaanona mboka ya valwa pethimbo lyemanguluko . Mbaka otaya ilongo nokutseya  ondjokonona moku talelapo omahala ngoka noku lesha kutya emanguluko ndyoka tali tyapulwa nena inali za puupu.

Oshikwawo ooshika kutya omahala mpoka pwa tulwa omapendafule getu na ga kale ga nika omwenyo. Kokutya pomahala mpoka na pakale omahokololo gomapendafule ngoka kondando yili  hwepo.Naashika otashi pumbiwa okulongwa  kepangelo lyoshitopolwa shoka sho olyo tali ngongopo ondjokonona  yomapenda agehe ngoka ga fumvikwa pOmaendo gOmapenda osho wo komahala galwe.

Omambo gondjokonona yomapenda ngaka naga kale gena nomahokololo  kutya ependa ndyoka olya longa shike opo iilonga yalyo yi tseyike noku uvikako nawa sigo aluhe. Naanguka omukalo nkene ombepo ye igandjo tayi kunwa mokati  koshigwana shetu.

Oshikwawo oshike epangelo itaali tungu po wo omandhindhilikwa hala taga simaneke aanamikunda mboka na yo ya kanitha oomwenyo dhawo osho wo ya hepekwa noku dhipagwa omolwashoka yo oya li taya kondjitha uukoloni unene tuu muumbangalantu woshilongo nopomahala galwe moshilongo shomapenda.Ethaneko shi li ekwiilongo hasho? Otandi dhiladhila kutya opena ompumbwe okutunga po omahala dhimbulutho  taga dhimbulukwa shoka sha longwa koombunga dhaantu miitopolwa,mboka yi igandja unene tuu ngaashi Ohangwena, Oshana,Omusati, Oshikoto, Kavango noZambezi momahala ngaka omo mwa li iilonga yuudhudhu ya longwa kepangelo lyuukoloni.

Ngame itandi kutya inapa longwa sha moshinima shoka nenge kutya kandi shishi kutya oonzo dhopashimaliwa odha pumba, ihe otu shi shi kutya Roma ina tungwa esiku limwe, onkene opo tu tunge Roma otwa pumbwa oku tameka  ngashingeyi, molwashoka ethimbo itali kala aluhe kombinga yetu.Kehe shimwe otashi vulika.

Oondhimbulutho dha dhikwa pOndeshifiilwa, mOshana, Eunda moshikandjohogololo Onesi, Onhokolo Nokafitu ka Kamba moshikandjohogololo Outapi odho iiholelwa yaashoka twa hala  oku mona tashi ningwa koombinga dhoshilongo shetu. Uuministeli Woonakulwa aakulu otawu longo nawa moku tula omamanya koombila dhaakondjelimanguluko ndhoka dha ulikwa , nawu tsikile niilonga iiwanawa ngaaka.

Oshikwawo inashi pumbiwa omuntu wu uve nayi molwashoka ndika olimwe lyomomadhiladhilo ngoka omuntu ta vulu okutala ga fa ga nika uugoya ihe omuleshi gwago oku na ehogololo  kutya ota tsu kumwe nago nenge ahawe.

 

LEAVE A REPLY

Please enter your comment!
Please enter your name here