Western Sahara okwi idhidhimikila elunduluko lyopambili.

0
154

 

Western Sahara oti ilongekidha noku tegamena  kutya pethimbo ndika iigwana yuuyuni otayi ka thiminika Morocco opo a pe oshigwana shika ompito yokuhogolola ngele sho osha hala okwi ipangela shoshene. Konyala opwa pita ngashingeyi omimvo 26 sho pwa tulilwe ehulithopo lyiita pokati komatanga gehangano lyaSahrawi moWestern Sahara nepangelo lya Morocco.

Opena ethimbo eshona nenge efupi lyowala oshoka yo oya hala omahogololo kombinga yondiimpangela ga ningwe mbala omumvo 2017 nenge nookuli kuyele. Po opena wo uutile  kombinga yaagundjuka yaaSahrawi mboka eidhidhimiko lyawo lilipo tali pupo unene tuu oku idhidhimikila omulandu gwepipi ekulu ndyoka lya tokola okutsikila neuvathano lyombili po pwaana nando elunduluko lyasha konima yomimvo dhi vule oshitine shimwe shethele mumvo.

Ishewe okatokolitho kIigwana Hangano (UN) 690 oka utha ando opo ehogololo lyoku ulika ngele oshigwana shika osha hala okwi ithikamena, li ningwe andola kwa li komeho gaFebruali omumvo 1992, ihe ngashingeyi otuli momumvo 2016.

“Onkalo inayi ngungumana, nopena uutile kutya moomwedhi 12 tu uka  aagundjuka otaya ka tameka okupopya elaka lya yooloka kwaandyoka lyelunduluko loypambili” osho Mildred Jantjies, Amushanga Pitithi gwehangano Pan-African Women’s Organisation mUumbugantu wAfrica a londodha.                                                                                                                                                                                                                                                                                                                                                                                                                                   “Yalwe unene epipi ekulu olina etegameno.Mbaka oya mona iita  noya hala omukundu gu kandulwepo pambili” osho a hokololele Kundana.

Oshike tashi ningwa po ngele esiku lya hugunina olye ya etali piti  inaa pa ningwa omahogololo ngoka, aagundjuka otaya ka tameka oku idheula nokwi ihomateka  omanga epipi ekulu tali tsikile oku uvitha elunduluko lyopambili?

“Otandi galikana opo shika shaa ningwe.Otu shishi kutya omakuyunguto ohaga eta shike. Africa ota tika ombinzi nale. Onkene Morocco oye ena okuthiminikwa  opo a pitike ehogololo ndyoka li ningwe,” osho Jantjies a ti , kutya shika otashi vulu okupitila moondjikila dhopamahupilo nomathiminiko gopapolitika   odho oondjila dhimwe tadhi vulu okulandulwa.

Okwa kundathana na Kundana konyala ethimbo efupi lyowala  konima yoku galuka kwe  koEuropean Union (EU) moBelgium moka ye pamwe naakalelipo yopapolitika ya Western Sahara ya li ya pula  iilyo yoparliamende ya EU opo yi talulule ekwatathano lyawo na Morocco.  Ehangano lyaakiintu lyo Pan-African Women’s Organisation olina uuthemba wokukala piinyangadhalwa yo UN na African Union, no lina elalakano okupewa omuthika tagu kalele momahangano ngaka gaali.

Pethimbo ndika omathaneko ngoka taga landulwa oongoka gelunduluko lyopambili”,  Jantjies  ngoka eli gumwe gwaapopiliko aanene  yaantu yoludhi lwaa Sahrawi moNamibia nomokati kiigwana yuuyuni osho a ulike.

Sho a tsakanene niilyo yoparliamende yoEU, Jantjies okwa indile opo EU a teye po omakwatathano gopaipindi noMorocco, molwashoka iipindi mbika oya  kwatelamo iilongomwa ya za moshitopolwa shoka tashi kondjelwa kaaSahrawi.  Oshoka, kaantu yaWestern Sahara iilongomwa mbyoka kayi na okulandithwa kuMorocco.

“Onkene oparliamende ya EU oyina okutula miilonga etokolo lyohofa ya Europa pautho lya Advocate General [Melchior Wathelet] kutya Western Sahara keshi oshitopolwa sha Morocco onkene EU na Morocco ka yena okukwatela mo iilongomwa ya Western Sahara meuvathano kehe lyopaipindi,” osho ya hokololele iilyo yoParliamende yaEU mbyoka yo ya tsakaneke.

Patokolo ndika lyomuadvocate Wathelet momasiku 13 ga Septemba nuumvo Western Sahara okwa sindana pauteknika  oshoka  “Western Sahara keshi oshitopolwa sha Morocco onkene euvathano lyaEU-Morocco Association Agreement, naandyoka lyoLiberalisation Agreement itaga vulu okulongithwa moshitopolwa shoka.” Etokolo ndika oshitopolwa  shoshipotha shoka sha kala noku pulakenwa omimvo ne sigo oompaka kombinga yiipindi yopaunamapya niikwahi pokati ka EU na Morocco.Ihe omadhiladhilo ngaka gOmupopiliko Ndjayi ogo owala omadhiladhilo gopampango no itaga dhengele kaapanguli mohofa ndjoka opo yega landule andola nonando ngaka ogena enwethemo enene.

Opwa li ishewe oohapu dhAmushanga Ndjai nale gwoUN, Ban Ki-Moon, omanga a li metalelopo miitopolwa mbyoka tayi kondjelwa mo Western Sahara. Ki-moon, konima yetalelopo lye okwa li a hutukwa kelaka a ti ekalopo lya Morocco olyo ekwatoko lyoshilongo shoka. Omupopyo nguka ogwa uvitha Morocco nayi , sho shika osha thiminike Ki-Moon opo omupopyo ngoka egu tendepo .Ki-Moon okwa ti omakuyunguto moshitopolwa shoka oga fala monkalo yoshiponga shaantu ya dhimbiwa tayi etitha ohenda.

Ehatuko lya Ki-Moon kutya nee okwe li shunithako, kaantu ya Sahrawi , ngoka ogwa gwana . “Otwa nyanyukwa sho a vulu okutalelapo oshitopolwa shika,” Jantjies a ti. Oye na etegameno kutya Amushanga Ndjai omupe António Guterres, OmuPrima Minista nale gwa Putu ota ka tala oshikumungu shika nomeho guutalambambi.

Ihe okuza muAfrika ewi lyoku yambidhidha oshikumungu shaaWestern Sahara osha fa lyaapo no itali uvika muule. Nenge tuu olyo eyambidhidho okuziilila Kuumbugantu wAfrika. Shika opamwe na Namibia ngoka a longitha ompito nolweedhe kehe okupopilako aaSahrawi.

“Eyambidhidho lyetu kaantu yaWestern Sahara olya kola  ngaashi ashike lya kala okuza nale sigo onena.Otatu yambidhidha notatu indile opo uutokolitho auhe woUN kombinga ya Western Sahara wu tulwe miilonga,” osho Omuprima gwopevi nOminista yOmakwatathano gOpaigwana  Netumbo Nandi-Ndaitwah a endulula.

Mu Juli nuumvo opwa li oshigongi moVenduka shoka sha tokola opo pu ningwe iikonga iinene muuyuni okuwu dhimbulutha kombinga yoshi kumungu sha Western Sahara taku longithwa iinyandwa miinyanga yokudhanena  mUumbugantu wAfrika. “Ongundu yiinyandwa ndjika oya tegelelwa okutalelapo Uumbugantu wAfrika osho wo kiilongo yimwe ya simana kombanda yomafuta.

Omalongekidho ngaka otaga kala oomwedhi hamano, nepulo oondika ngele  ethimbo ndika olya gwana tuu.Kapena oshilongo nando oshimwe sha tile sha pethimbo Morocco a ti okwa hala okupewa oshipundi sho African Union nuumvo.

KuJantjies sho Morocco ena ehalo lyoku kala pomulilo gwa AU oshinima shi ili shoka tashi vulu oku endeleleka omahogololo ge ithikameno mo Western Sahara.

“Morocco okwa thigilepo ehangano lyAfrika pethimbo hali ithanwa OAU (Organisation of African Unity). Ngashingeyi okwa hala okujoina AU. Ita galukile koAU molwa shoka ka li nando oshilyo shehangano ndika petameko lyalyo. Nongele okwa hala okujoina  AU nena okuna okugwanithapo iipumbiwa ngaashi yu uthwa kekotampango lyo AU’ “Shika oshinima tashi gumu omakankameno gopampango. Oompango otadhi ti ngiini kombinga yoshilongo tashi kolonyeke oshikwawo,” Jantjies osho a pula ?Ngele Africa ita ningi po sha pethimbo ndika nena shika otashi ka kala iilonga yaana uuyuki.”osho a ulike

Iitsa yimwe:

Western Sahara oshilongo mUumbangalantu wAfrica komunkulofuta gwaAtlantika sha palathana na Morocco, Algeria osho wo Mauritania. Osha kolonyekelwe kuSpain mo 1884 nokukala oshitopolwa shuukwaniilwa  waSpain omimvo dhi vule ethele. Oshilongo sha nika ombuga moka konyala oshititano shimwe osho ashike hashi longithwa uunamapya.Western Sahara okuna uuyamba wo phosphate niitenda kohi yevi nokwa itaalwa kutya okuna omahooli inaaga gumwa natango mefuta. Aavalelwamo yomoshilongo shika oyo konyala aantu omayovi gomathele 570,000—yeshiwike nawa ongaa Sahrawis neitaalo ndyoka tali dhana onkandangala olyo shi Islam. Kombinga yimwe okuna Morocco; nokonkwayo ehangano lyaavalelwamo Sahrawi na Algeria. Mo 1975, Morocco okwa yuguko Western Sahara okupitila mushoka hashi ithanwa omunyanyo gwaziza , ngoka gwa li molupe lolweendo lwaaMorocco omayovi 350,000 mboka ya katukile ashike moshilongo shoka noku shi kuthako ngaaka etaya ti shika osha ninga shawo . Konima Spain okwa gandja ewiliko lyoshitopolwa shika kuMorocco na Mauritania. Oshilanduli osho ethikamekepo lyehangano lyo Polisario Front—ehangano lyaaSahrawi  omumvo 1973 okukondjela emanguluko lyoshitopolwa shoka. Ehangano ndika olya ka tameka iita yoguerrilla okukondjitha aakolonyeki  aa Morocco naaMauritania.Iita mbika oya kala tayi kondjwa sigo oosho pwa adhika ehulithopo lyomaumbathano mo 1991 pakwathelo lyoUN.. Iita mbika oya halakanitha aantu ya Western Sahara,sho oyendji yomuyo ya matukile ko Tindouf moAlgeria hoka yeli sigo onena. Ehangano lyoontauki lyo UN otali tengeneke kutya  konyala muna oontauki omayovi 90,000 omanga epangelo lya Algeria otali tengeneke muna oontauki dhili lwopa 165,000.  Pethimbo lyiita, Mauritania okwa gandja oshitopolwa  omanga Morocco okwa tungu ekuma lyeenda mokati koshitopolwa shoka.

 

 

LEAVE A REPLY

Please enter your comment!
Please enter your name here