Witbooi a indila ovawiliki veekinda va longele kumwe

0
189

Lüderitz – Omupedu Minista mouMinisteli wou Kakwashike kOokanhu Lucia Witbooi, okwa indile ovakwateli komesho veefikola doikunino (Kindergarten), va longele kumwe, va tale nghene tava shunifa pedu ehapupalo leefikola  doikunino  momalukanda a yooloka.

Witbooi okwa yandja omayele kovawiliki novakwateli komesho voikunino a ti, ngee ovalongele kumwe, nena otashi ke va kwafa opo vadule okufikamifa po eefikola  doikunino dili pomufika uli nawa.Osho yoo dina omayakulo aeshe taa pumbiwa moku fila oshisho ounona noku vapa omukangha wa kola mokukalamwenyo kwavo.

Okulongela kumwe, otaku yandje yo omhito opo oipudilo ei idule yoo okumonenwa omayambidido, ongee okudja komahangano oo haa yandje omavatelo, ile okumona eyambidido okudja kepangelo paku yandja ondjabi oyo hai pewa ovalongi voikunino.

Omupedu Minista Witbooi okwa tumbula edi oshivike shaya pefimbo ali momutumba novawiliki veefikola  doikunino vefike pomulongo vomo Lüderitz osho yo mo Aus. Omutumba owa li pombelewa yoshikandjohoololwa sha!Nami#nus.

Witbooi okwa indila opo ovanhu va kale noku landula omilandu odo da tulwapo kepangelo ngeenge omunhu ota tula moilonga ofikola yoshikunino. Ta tumbula kutya eembelwa doshikondo shae konyala ode li hanena oshilongo, nomoLüderitz omo dili.

Okwa indila ovakwatelikomesho veefikola doikunino opo va longele kumwe nombelewa oyo, opo va dule okumona omauyelele oo taa dulu okuyambulapo nokweeta eefikola doikunino pomufika uli nawa.

Okwe va kumaida yoo opo va kale nokulongela kumwe novaleli vo meedolopa davo.

Ovakwatelikomesho veefikola doikunino ovo vali va ongala vamwe po ovali va shiivifila Omupedu Minista omaudjuu oo vena, ngaashi omukundu wedu, osho yo ovadali vamwe ovo ita veli tulamo moku futila ounona vavo, nosho tuu.

Kombinga yomukundu wedu Witbooi okwa tumbula kutya ou otau dulu ashike okupotokononwa, kovaleli vo doolopa.

Kombinga yofuto okufutila ounona ofikola yoshikunino, Witbooi, okwa yandja omayele kovadali ovo ita va dulu okufuta, opo va longife omikalo oyo taidulu okuyambidida, ta ve shi ningi pamukalo woku li yambela oinakuwanifwa.

Kansela woshikandjo hoololwa sha !Nami#nus Jan Scholtz okwa tumbula kutya okwa ninga ekwatafano nouMinisteli woilonga noyeendifo  modoolopa opo umu pe eenhele depangelo odo dili mo Lüderitz, no kwa pewa omusholondodo weenhele 22 depangelo dina nale omayakulo, omo a tofamo onhele imwe ili kolukanda la Nautilus, kutya oilimo nale ina elalakano loku tungwa ikale onhele yofikola.

Omusholondodo weenhele depangelo edi Scholtz okwe di yandja komupedu Minista Witbooi.

Meya waLüderitz Hilaria Mukapuli okwa koleka osho sha popiwa kuWitbooi kutya ovanhu ovo vena eefikola doikunino nave di shiivife kombelewa yae, shaashi oina oshikefa osho hashi mono omayambidido okudja komahangano noko va nangeshefa  modoolopa.

Mukapuli ta tumbula kutya, ngee va mono omavatelo otava dulu ashike oku a topolela ovanhu ovo ve linyolifa nove shiivike kombelewa yae.

 

 

LEAVE A REPLY

Please enter your comment!
Please enter your name here