Eyambidhidho inaali gwana lya simpike eyamutho kontulo

0
152

Windhoek

Nonando oku mona omunona oshinima tashi nyanyudha, Teresa Paulus ngoka opo a pulumutha lwotango okwa ti oshi dhigu okuyamutha omwana kontulo.

“Sho nda mono omunona omvogu kandali ndina ontseyo ya nkene tandi mu yamutha kontulo yo ishewe aapangi kaya li yena ombepo ombwaanawa oku kwatha ndje, naashika osha dhigupaleke oonkambadhala dhandje oku yamutha omumwandje” osho a hokolola.

Omuvali omugundjuka nguka okwa ti nonando a li i ilongekidha nawa okuyamutha mokulesha omambo niinyolwa kombinga yaashika eilongekidho ndyoka inali mu kwathela sha sho a li a taalela uushili woku yamitha wowene.

‘Oondungu dhomagundji gandje odha li dha tende  molwashoka omunona ka kwa li nde mu tula nawa egundji mokana” osho a dhimbulukwa.

Pahapu dhehangano lyUundjolowele mUuyuni WHO, okuyamutha kontulo oko omukalo gumwe omwaanawa oku kwashilipaleka kutya  omunona okuna uundjolowele nosho wo ota kala nomwenyo.

Ngele omunona okwa yamuthwa kontulo otundi yimwe konima yokuvalwa ,noku pewa omahini gokontulo ageke uule woomwedhi hamano dhokukalamwenyo kwe sigo oosho ta gwanitha omimvo mbali nena konyala aanona 800 000 otaya ka hupithwa omumvo kehe, pahapu dhoWHO.

Muuyuni auhe konyala oopelesenda kohi yomilongo ne dhaanona  kohi yoomwedhi hamano odho hadhi yamuthwa kontulo akuke pamiyalu dhoWHO. Ihe nando ongaaka omunawino miipalutha Dorle Verrinder okwa ti omuthika gwoku yamutha kontulo moNamibia ogwa nkundipala unene.Nonando osha pumbiwa opo aanona ya yamuthwe kontulo  akuke uule woomwedhi hamano, aavali oyendji iha ye shi pititha, osho omunawino miipalutha  ngoka ha yambidhidha eyamutho lyokontulo a ulike.

Nando opena omatompelo ogendji ngoka taga imbi aakiintu ya yamuthe kontulo uule wethimbo, Verrinder okwa ti etompelo enene lyomwaangaka olyo eyambidhidho lyaakiintu taa yamutha ndyoka inaa li gwana nenge lyaahepo nande nande.

“ Opena omatompelo ogendji ngaashi mboka yaana omahini ogendji, onkalo ndjoka hayi holoka molwashoka omuyamuthi oha ka yamutha pomathimbo gu uthwa okuyeleka neyamutho uuna omunona a hala okuyama ngele uuvite ondjala. Uuna ho yamutha omunona olwindji ngaashi wu uvite, okuyamwa otaku  fala mevivilo lyomahini momagundji gomuyamuthi” Verrinder a fatulula.

Omapukululo kombinga yokuyamutha kontulo osho wo eyambidhidho lyaakiintu taya yamutha pamwe niilyo yefamili moka muno okahanona olya simana opo okuyamutha kontulo ku tsikile, Verrinder a ti.

Okwa ti olundji aakwanezimo lyomuyamuthi ohaya gandja ethaneko kutya okanona naka pewe omahini gomoondooha, pehala  lyoku konga omikalo nkene omahini gomuyamuthi taga indjipalekwa noku tanekwa montulo.

Nando Teresa eshi pondola okuyamutha omwana kontulo uule woomwedhi hamano molwashoka kali ena iilonga pethimbo ndyoka, okwa ulike kutya aayamuthi oyendji iha ye shi pondola oku ya yamutha nando odho oomwedhi ndatu.

Oshiwakwawo , yamwe yomaavali naayamuthi aagundjuka oyena uutile kutya  eyamutho kontulo otali papitha nenge otali nengeneke noku endjeleleka omagundji gawo.

‘Moku yamitha kontulo kwa gwana olutu lwomuyamuthi ohalu shunako konkalo yaahoka lwazi manga omuyamuthi a li inaa ninga omusimba” osho omuyamuthi nguka a ti. Okwa tsikile a ti omahini gokontulo ogena uuwanawa owindji wopaundjolowele komunona.

“Opwa li ethimbo limwe omumwandje a li te ehama omeho no nda tameke oku mu kandela omahini momeho ge agehe konyala oshiwike shimwe naashika osha kwathele” osho a hokolola.Okwa ti okuyamitha ohaku tulapo wo ekwatathano ewanawa pokati komunona na yina.

‘Omumwandje onde ke mu tameka nomahini gomondooha sho a li pokuninga omvula yimwe nonda koneke kutya omahini ngoka kali ega taambako nawa ngaashi ngoka gokontulo.”osho Teresa a ti.

Kepulo ngele ye oha yamuthile omwana mokati kaantu : “ Ihandi yamutha omumwandje miipathi yaantu shika oshinima shopaumwene shoka ndina ashike okutopola  nomumwandje.”

Ihe opwa li oompito dhimwe ali a thiminikwa okuyamutha  omwana mokati kaantu. “ Osha li pethimbo ndali nda ya kundohotola gwandje” osho a dhimbulukwa.

Verrinder  kombinga ye okwa ti  aayamuthi ohaya kondjitha nokuyamutha kontulo mokati kaantu molwashoka ‘iha ya kala yu uvite oshipu oku shi ninga.”

“Pethimbo ndika aayamuthi oyendji ohaya yamuthile muundjugo.Ndele ngele aantu oyendji  oye shi popi noku shi kundathana kutya oshi li nawa nena okuyamutha kontulo mokati kaantu itaku kala uupyakadhi.” Verrinder a ti. Okwa ti oositola nomahangano ogena oku kumikwa opo ga tulepo omahala goku yamuthila.

Kombinga onkwawo omunamimvo 29 Liezl Diergaardt  okwa ti: ‘Ngame omupopili gwoku yamutha kontulo mokati kaantu. Sho omumwandje a li ena iiwike iyali onda tameke okuya naye pondje yegumbo.Lwotango inandi mu yamutha kontulo nda shiga egundji aawe onde mu tula ashike kontulo noku mu pa a lye shafa ashike oshinima osho shina okuningwa muuyuni, shaashi eeno osho shina oku kala.”

Diergaardt okwa ti kapena nando ogumwe emu indile opo a siikile ontulo ye pethimbo ali ta yamutha nenge a li e mu talaa nonkumwe. ‘Okuza mpoka inandi siikila we tuu egundji ndyoka kwa li taku yamwa komumwandje uuna te shi ningi montaneho. Nongashingeyi ohatu shiningi lela twa pyokoka. Kokutya ngaaka ohandi vulu okuyamutha omanga wo ndili mositola tandi landa iipumbiwa yomegumbo.” Osho a popi ye te shi yolo po.

Elago enene oondika kutya omusamane gwe na ye kena uupyakadhi noku yamutha mokati kaantu osho a ti. ‘Oha ti omunona gwetu ngele okwa sa ondjala, okwa pumbwa okulya ngaashi ashike omuntu kehe ena oku shi ninga. Kashina mbudhi kutya shika otashi ningwa pethimbo lini nopeni. Nuuna uuvite nayi nenge a pumbwa oku loololwa nena ngame ohandi mu yamutha kutya nee onda li tandi ningi shike” osho ondohotola ongundjuka ya ti.

Diergaardt okwa ti ye omunelago oshoka olweendo lwe lwoku yamutha olwa li olupu okuyeleka nooyakwawo yalwe oyendji.

“Aantu oya pangula noku popya nayi kombinga yaakiintu uuna ya yamutha oyana kontulo miipathi” osho a ulike. Aakiintu yamwe otaya ehama onkene ina ya mona ethimbo lya gwana okuyamutha oyana ngaashi yo yali ya hala.

“ Okululilwa konkalo  ndjika yomukiintu ena okanona okashona nosho wo okwi ilonga omukalo gwoku yamutha oshinima oshidhigu kaakiintu yamwe, osho a popi.Ngame ondi itaala kutya otuna okulonga shoka tu uvite shoopalela aana yetu natse yene’

Okwa gunu aakiintu opo ya tseye iitsa ya simana kombinga yoku yamutha kontulo nosho wo yi ilonge shoka tashi ya opalele naashoka wo tashi longo kuyo.

“ Onda tseya aakiintu yamwe mboka haya yamuthile oyana miihauto oshoka ihaya kala yu uvite oshipu oku shi ningila montaneho yaantu oyendji.Shika otashi kala ehogololo lyakehe gumwe, Ndele shoka ndu uvite ooshika kutya aayamuthi oyena okukala ya manguluka oku pa oyana ya lye mokuya yamutha kontulo shaampoka yeli unene tuu ngele omunona oku uvite ondjala.

LEAVE A REPLY

Please enter your comment!
Please enter your name here