Omukuluntu gwoSpur ina panda uudhano waa na aatali

0
200

 

OSHAKATI-Omukuluntu gwositola yiikulya mOngwediva yedhina Spur Silver Wolf okwa gandja enyenyeto lye moonkundathana na Kundana Osoondaha yaziko puudhano mboka wali wa kwashilipalekwa kehangano ndika.

Deon Britz okwa ti“Nonando oosipana odha li dha yamukula kehiyo lyetu olwindji odha li dha dhana nokapale kaa kena aatali, oshinima shoka ta shi kutha etanga lyokoompadhi ongushu”.

Britz okwa ti omwaalu omunene gwaatali ohagu tula ongushu etanga  lyokoompadhi  na ohagu hwameke aadhani ya dhane yi itulamo  oshoka oye shi kutya opuna mboka yeya tala.

Okwa gandja uusama koosipana sho natango dha longo onkudhu oku tseyithila aalanduli yadho kuupale ta ti shika oshina oku kala oshinakugwanithwa shoosipana opo dhi mone kutya odha tseyithila aantu yomomalukanda gwawo kutya otaya ka kutha ombinga momaudhano opo aantu ya wape yakale yena ohokwe yoku ya landula.

Omukundu guupale kaawuna aatali kaguli ashike mOshakati, ashike ogwa kundukidha oshilongo ashihe, sho uupale owundji ha wu kala wuna ashike aantu taya yalulwa naashika ota shi shunitha ombepo yuudhano pevi.

Britz ta tsikileko ta ti nando aatali kaya li ya holoka momwaalu omunene shika ita shi ya teya omukumo oku tsikila komeho noku kwashilipaleka uudhano mbuka oshoka oshi li oshitopolwa sho miinakugwanithwa yoSpur okutopola noshigwana shoka haya mono.

Okwa ti otaya ka kwashilipaleka uudhano mbuka nomvula tayi ya naakalimo yokoNooli naya tegelele oshindji oshoka otaya ka galuka yamanga sha kola.

Otonamende yoSpur ndjoka ya li ya dhanwa uule womahuliloshiwike gaali oya li ya manithwa Osoondaha yaziko nosipana yo KK Palace oyo omusindani guudhano mbuka konima sho a li a dhengemo Future FC 1-0 medhingoloko lyahugunina.

KK Palace okwa li a toolapo okapandi koodola N$ 10 000, ekopi noombandi dhoshingoli.

Future FC okwa li eya pehala etiyali moka a toolapo okapandi ko N$ 5000, noombandi dhoshiSiliveli.

Ongwediva City oya li ya dhengemo Golden Bigs 6-0 nokulikola ehala etitatu muudhano mbuka moka ya li ya pewa okapandi ko N$ 3000, noombandi dhOshikushu.

Golden Bigs okwa li a hekelekwa nokapandi koodola N$ 2000, aadhani oyendji oya li ya pandula ehangano lyoSpur sho lya kutha onkatu opo li ya pe omaudhano unene tu sho pethimbo ndika ooliha moshilongo dha tulamo ombiliki.

LEAVE A REPLY

Please enter your comment!
Please enter your name here