Omukwetu gwa pewa oshindji kuNendongo

0
319

 

ONIIPA – Oshilyo shongerki yaElcin sha tseyika nedhina osha tondoka onkugo sho sha landele oshifo shOmukwetu oshihauto omashina gokwiindjipaleka, niinima oyindji.

Pethimbo shi ongeleka yali tayi tyapula edhimbulikotho lyoomvula 115 dhoshifo shOmukwetu, Abisai Panduleni Nendongo opamwe naakwaELCIN ooyakwao oyali ya tondoka onkugo, opo ya yambidhidhe oshifo shika shi vule okutsikila iilonga yasho.

Aantu oyendji oyali ya gongala pOniipa noku tyapula oshituthi-valo shoshifo shika.

Abisai Panduleni Nendongo oye a li a gandja oshindji. Nendongo okwa gandja ohauto ompe koshifo shika, niikwathitho mbyoka tayi kala tayi longithwa mombelewa yasho aluhe.

Ohauto ndjoka ya gandjwa esiku ndyoka oya tengenekwa yina ongushu yoshimaliwa shi thike poN$263 000. Kosheenditho okwa gwedha ko ishewe omakwatho ngoka gongushu ithike piimaliwa tayi ihilile pooN$302 373.

Nendongo pethimbo ta gandja osheenditho shoka shoIsuzu, yina onomola yopaumwene ya shangwa Omukwetu, okwa uvaneke ta kala ta  gandja omakwatho kiinima yongeleka opo yi vule okuhuma komeho nawa.

Omukwetu ogwa totwa po pethimbo lyaatumwa Aasuomi, nelalakano lyokulonga aantu okulesha, okushanga oshowo okwiimba.

Omuwiliki mbiisofi mongerki yaELCIN Omundohotola Shekutamba V.V Nambala pethimbo ta taambako osheenditho shoka okwa pandula Nendongo sho aluhe ha kutha ombinga miipambele ya guma ongeleka, noha gandja omakwatho poompito dha yooloka, okwa kumike wo iilyo yilwe yi kuthe oshiholelwa shika oshiwanawa, yo yi kale tayi gandja omayambidhidho mpoka sha pumbiwa.

Shino osho osheenditho oshitiyali Nendongo ta gandja meyakulo lyaELCIN, pehulilo lyomumvo gwa ziko okwali a gandjele ohauto ompe kegongalo lyaandjawo Onayena, opo yi kale tayi longithwa okututa nokuhumbata iinima yegongalo.

Amushanga gOmukwetu Omusitagongalo Tomas Uushona okwa hokolola kutya oshituthivalo shotango shOmukwetu osha li sha dhanenwa megongalo lya Hosiana mOvenduka, hono kwali kwa gongelwa oshimaliwa shi thike pooN$110 000 lwaampoka. Ta ti iituthivalo ayihe iyali oye enda nawa.

 

 

LEAVE A REPLY

Please enter your comment!
Please enter your name here