Omundilo omukumithi gwafike po ohauto nondunda yokupungula

0
578

 

ONGWEDIVA- Omukalimo gwomOnyelelo, moshikandjohogololo shEtayi moshitopolwa Omusati okuli meshongo enene sho omundilo tagu kumitha gwa eta eyonuko enene megumbo lye oshiwike shika.

Omusamane Onesmus Negongo omuniilonga moVenduka okwa ti eyonagulo ndyoka lyeetwa komulilo nguka oteli tengenekele pongushu yooN$ 250 000.

Omukulukadhi gwomusamane Negongo meme Martha Itumba oha longo mopolisi ya Namibia poombelewa pOmungwelume.

Okwa kundanwa kutya mOsoondaha yaziko ooyene yegumbo manga taya ilongekidha oku shuna kiilonga, omundilo ogwa tukuluka tango mohauto moka gwa fike ashike iipundi ihe momutse gwohauto nokolutu ina ku pya.

Iitumba ngoka a popi na Kundana mongodhi okwa ti omundilo nguka ogwe mu kumitha no kena iitya nomatumbo oku gu hokolola.

“ Omanga tuli megumbo tatu ilongekidha oku  shuna otwa uvu uunona wetu tawu ti ohauto oya tema meni tayi pi, otwali twa haluka noonkondo , na otwa ningi onkambadhala oku yi dhima noya dhimi,” Iitumba a ti ngaaka.

Okwa tsikileko woo ta ti okuza mpoka ohauto oye yi undulile mepya opo yaa fikithe egumbo ihe sho ya galukile megumbo oya adha ondunda yaakuluntu ya pya thilu yo oyo nduno yali yina iinima ayihe yondilo mwakwatelwa nopanela yolusheno lwoketango.

“ Mondunda moka omo mwali mwa siikililwa iinima yegumbo alihe ihe ina mu hupa nande oshaa sha,” ati ngaaka ne yeme.

Okwa ti kutya oshiningwanima shika osheya yemateka noku ya tula pomutenya na ota indile nesimaneko enene opo aanamutimahenda yopambepo ye ya galikanene opo oshinima shika shaaholoke we megumbo lyawo.

Okwa ti kakele kondunda yawo nohauto nolusheno lwoketango mbyoka yapya po thiluthilu, ina hala we omundilo nguka gu galukile moondunda ndhoka dha hupako unene dhuunona nomuniilonga ngoka ha keelele megumbo.

Ota indile noonkondo opo ya tulwe momagalikano opo egumbo lya wo li kale lya gamenwa.

LEAVE A REPLY

Please enter your comment!
Please enter your name here