A tokola e li twale konakupila medina lombwa

0
378

 

Ongwediva

Omukainhu omunyasha okwa tetwa meemhango kovapolifi voshilando shaWindhoek eshi a li ta kendabala eli kufe omwenyo molwaashi ta kufwa ombwa yaye oyo ya nyika oshiponga kovanhu.

Otaku hokololwa omukainhu wedina ina li tumbulwa womolukanda laOkuryangava moWinhoek a li a uda nai molwaashi a kufwa ombwa yaye oyo ha i ponokele noku lumata ovanhu.

Omupopiliko woCity Police Cillie Auala okwa hokololela Kundana kutya omafiku aa okwa li va ufanwa kOkuryangava oko ombwa yomukwashiwana wonhumba ya lumata noku ehameka okamatyona komido omugoi.

Okamatyona oko vati oka twalwa koshipangelo shaKatutura ka ka mone ouhaku eshi kali ka monifwa oshiponga.

Ovakwashiwana vopomudingonoko opo vati ova lombwela ovanambelewa voCity Police kutya kakele kokamatyona ombwa oyo, oya monifile nale ovakwashiwana vavali oiponga. Sha hala kutya okamatyona oke li omunhu omutitatu ta lumatwa  kombwa oyo tuu oyo.

Shaashi ombwa kaya li ili meameno, ovanambelewa voCity Police ova kendabala ngeno opo vi kufe po, ve i twale ko SPCA manga mwene wayo ta tale kutya ote i tula meameno ngahelipi, opo iha monife vali ovanhu oiponga.

“Omukainhu ou okwa li eli kondje yoveta shaashi, oveta oya yela kutya ngeenge oto kala nombwa nai kale ili modalate ile mekuma ile ili mokakondekela omo ita i dulu okudja mo i monife ovanhu oiponga. Ashike ye kali ena nande oshimwe shomwaai, yo obashu yaye oi li unene mokati keebashu dikwao, po opo pepi nofitola oko haku i ovanhu vahapu,” Auala ta fatulula.

Eshi a lombwelwa kutya opolifi oya tokola opo i twale ombwa yaye koSPCA, omukainhu ou vati okwa nyamukula ovapolifi kutya ngeenge ova kufa po ombwa yaye, omwenyo ote u li kufa. Vati okwe va lombwela kutya ye kena xe, kena ina, kena mumwaina, aveshe ova fya, ombwa yaye oyo aike omukwanedimo laye wopopepi.

Ovapolifi eshi ngoo ngeno tava pilamene ko nombwa, omukainhu ou vati ye okwa ya meemhango. Tave mu kufa mo meengodi dolusheno odo a li te limangeleke nado.

Auala ta ti opolifi oya kendabala opo i mukongele ekwafo kovaxungimwenyo ovo vometanga lopolisi yaNamibia.

Konima eshi a popiwa naye omukainhu ou ombwa yaye okwe i shuninwa.

 

LEAVE A REPLY

Please enter your comment!
Please enter your name here