Va nyekwa oikutu kovanambelewa voCustoms

0
318

 

Lüderitz – Oikutu yomadina ta kufekelwa oikengelela, yongushu yeeN$73, 000 lwaapo oya kufwa meengeshefa dopatatu oshivike shaya po Waterfront mo Lüderitz.

Ovanangeshefa vanini ovo ta ve li kongele omboloto, noku yandja yoo oilonga ku vamwe, ova nyematela ovanambelewa voCustoms mo Lüderitz molwoshinima eshi

Ovanangeshefa ava vatatu ovahokololela Kundana tava ti, ka ve udite nande ombili omolwa ova nambelewa vo Customs mo Lüderitz ovo va yukulula mo oidjalomwa yomadina, oo vali valeka meenhele omo hava landifile po Waterfront mo Lüderitz.

Otava hokolola kutya oikutu vati oya kufwamo opo ika konaakonwe ngeenge oyo tuu shili yomadina oo a shangwako ile ei eekopi.

Ovanangeshefa ava ota va yandje ombedi kovanambelewa vo Customs kutya, omolwashike ava inaa va konaakona oidjalomwa oyo pefimbo vo va piti nayo peengaba nokufuta oi shoshela okudja ko South Africa oko  hava landa oidjalomwa oyo ha veya okulandifa?

Ovanangeshefa, otava tanguna yo kutya, oikutu oyo hava landifa iha vei lande nande meefaabrika omo haindulukwa ndele oha ve i lande meefitola da yooloka.

Omunangeshefa Lukas Wedeinge mongeshefa yae ota ti omwa kufwa oikutu neenghaku aishe kumwe ili 110, ina ongushu N$36 000,  omanga Gerson Titus ta ti mu yae omwa kufwa oidjalomwa yongushu yeeN$25 480.

Omanga omunangeshefa Johannes Petrus  mongeshefa yae mwa kufwa, oidjalomwa yongushu N$12 000.

“Fyee ohatu kendabala oku likongela omboloto pamukalo wongeshefa, noku yandja yoo oilonga kuvamwe, ngaashi ame onda kuta ovanhu veli vatatu, paife openi handi ka hanga oimaliwa yokufuta ovanailonga, nokufuta onhele omo handi landifile?” umwepo womo va nangeshefa osho a tumbula.

Otava hokolola kutya voo ina va hangikamo modoolopa eshi oikutu yavo ya kufwamo omwahangika ashike ovo ha ve va landifile, shaashi voo ova hangika va ka teka oilandifomwa yavo.

Mokwaaluka eshi vaya ko keembelewa do Customs mo Lüderitz  otava ti ova lombwelwa kutya, oikutu yomadina oyo ya kufwa meengeshefa davo otai tumwa ko Windhoek opo ika konaakonwe, ngee oyo shili ile oikengelela. Ta vati ova yelifilwa kutya ngee kaifi yoikengelela otave yaa lulilwa, nongeenge oyoikengelela, otai kahanaunwapo noku xwikapo.

Ovanangeshefa  ota va indile opo ovanambelewa vo Customs va kale vena omashina oku konaakona oikutu yomadina oyo hava kala tava fekele kutya oyoikengelela. Tava yandje omayele kutya, ota shika kala shili pauyuuki ngee tava kala noku konaakona pefimbo opo ovanhu tava eta oilandifomwa oyo moshilongo, oshoyo ngee tava ile oikutu meengeshefa, vakale noku ikonaakona pefimbo olo tuu olo.

Ovanangeshefa ava ova yandja yoo ombedi kovanambelewa vo Customs tava ti, ova yukululamo ashike oilandifomwa meengeshefa daava vatatu, ndele ina vaya yoo meengeshefa da yooloka modoolopa.

“ Ota shi tu nyemateke unene oikutu yetu oya kufwamo metitatu ladjako ashike eshi hatupopi nena ngaha Omaandaha, otwali hatu ende meefitola dimwe modoolopa ndele oikutu yomadina ya faafana naayo yakufwa meengeshefa detu omo ili momalandifilo.

Oshikonga oshali shina oku kwa telamo eengeshefa adishe modoolopa, kashili pau yuuki.” Ovanangeshefa tava yandje ombedi.

Omupedu wiliki moshikondo sho Customs koumbuwanhu woshilongo Boas Haikonda, eshi apulwa ku Kundana, kombinga yo shiningwanima eshi, okwa tumbula kutya, ombelewa yaye inai yakula natango olopota oyo, okudilila koLüderitz, ashike okwa koleka kutya ombelewa yo Custmos otai kendambala oku keelela oikengelela oyo tai ndulukwa ongee omoidjalomwa, nomoinima ya yooloka,  tai landifwa moshiwana.

LEAVE A REPLY

Please enter your comment!
Please enter your name here