Ve lihonga omifyuululwakalo domoNamibia

0
236

 

Lüderitz – Ovanafikola oshoyo ovahongi aveshe kumwe 20 oku dilila koTraveling School yokoUnited States of America (USA), ova talela po oBenguela Community Skills Development Centre (COSDEC) mo Lüderitz Etitano laya.

Ovalongwa 16 oshoyo ovahongi vane vokoTraveling School USA ovali va ongala pendiki loCOSDEC moLüderitz, nelalakano opo va tukulilafane eewino di na sha nomifyuululwakalo, domoNamibia.

Omukwateli komesho wosheendo shoTraveling School Meredith Bannon okwa tumbula kutya yee opamwe novalongi vakwawo oshoyo ovalongwa pofikola yoTraveling School USA ova kufa olweendo va tavakane Africa opo ve li honge noku konaakona omifyuululwakalo dovaAfrica.

Bannon okwa tumbula kutya, ova pandula unene, omukwateli komesho wendiki loCOSDEC moLüderitz Suzan Ndjaleka, eshi eva yakula nokuunganeka ovanafikola ovo hava fikola pendiki lo COSDEC moLüderitz, vadule oku ulika paxupi omifyuululwakalo davo.

Osheendo shovanafikola ava osha yandja yoo omaano N$2000, kendiki loCOSDEC moLüderitz, nelalakano olo okukwafela mokuxumifa komesho omadeulo oo haa yandjwa kendiki olo tuu eli.

Eengudu dopamifyuululwakalo da yooloka odali da mwenyeka po shiindingili opo tuu opo, ngaashi ongudu oyo yali tai imbi nokudana oyiimbo yopamufyuululwakalo yovaWambo, yovaNama oshoyo yoVaherero.

Ovanafikola no vahongi pendiki loCOSDEC, ovali tava monika nawa eshi va djala omidjalo do pa mifyuululwakalo davo.

Bannon okwa tumbula kutya osheendo shavo ota shi twikile noku talelapo oilongo ya yooloka muAfrika, nelalakano limwe alike, okutala noku li honga omifyuululwakalo do va Africa.

LEAVE A REPLY

Please enter your comment!
Please enter your name here