Kaxuxwena ota ka ulika uumbulukweya uupe

0
178

Windhoek

Otashi ka kala ishewe ongulohi yomainyanyudho ehulilo shiwike ndika sho omukadhona dhingi moku katuka, Meriam Kaxuxwena, ta ka ulika uumbulukweya wokohi uupe mboka opo a nduluka po.

Pinehas Nakaziko ota kundaneke kutya omauliko giizalomwa mbika yokohi yoomeme  otaga ka ningilwa pendiki lyiigongi lyaNampower Convention Centre momasiku omilongo 29 gomwedhi nguka.

Kaxuxwena ngoka a ningi ethimbo ele ko Brazil hoka oko a kala ta longekidhile esiku lye ndika enene, okwa nyola kepandja lye lyoFacebook noInstagram kutya shika osho oshituthi tashi ka kala she enda nawa, oshoka okwa ninga omalongekidho ga kwata miiti.

Konyala uumbulukweya wokohi womaludhi geli lwo po 20 gayoolokathana otawu ka ulikwa. Shika hasho oshikando shotango Kaxuxwena ta ulike iizalomwa yoludhi nduka sha landula sho omvula yazako ali a ulike ishewe uuBikini womiizalomwa mbyoka ye a nduluka.

Omvula yaziko Kaxuxwena okwa li a ulike uubikini omaludhi gane, wolupe lwoshiBrazil. Omwaalu gwaadha pongundu yaantu omathele ogendji ogwali gwa udha moNampower Convention Centre, opo ya tale kutya Kaxuxwena okuya nine shike ongulohi ndjoka.

Uubikini mboka wali wa ningwa nuukeka nowa li wa hokitha oyendji owa li wa ulikwa kaakadhona nokaamati mboka kumwe ya li yethike paantu omilongo ne.

Nuumvo ota ti kehe gumwe ote ki imonena po sha pomauliko ngaka, oshoka oku ya nine omaludhi guumbulukweya wu na omalwaala ga yoolokathana, mboka wa ningwa nawa. Uumbulukweya wokohi mbuka auhe otawu ka landithwa koodola dhaNamibia 300.

Kaxuwena ngoka ashike ena oomvula 22, okwa kala no ku longa nuudhiginini okuyambulapo Namibia sigo opomuthika ngoka gwopombanda.

Kaxuxwena okwa hiya aaNamibia opo ye ke mu yambidhidhe pethimbo lyomauliko giizalomwa yokohi mbika.

Uutekete otawu ka landithwa koodola dha Namibia ethele. Nomiyelo otadhi ka patuluka poheyali yokomatango.

 

 

 

LEAVE A REPLY

Please enter your comment!
Please enter your name here