NAMFI a hovela oku deula ovanailonga vomefuta

0
176

 

Lüderitz – Endiki loku deula ovanailonga vomefuta ilo Namibian Maritime & Fisheries Institute (NAMFI) ola hovela noilonga yalo, okudeula ovanailonga vomefuta, modoolopa yoko munghulofuta Lüderitz.

Ovanailonga vomefuta vefike 35, vongudu yo tete okudeulwa mendiki eli mo Lüderitz, ova hovelele omadeulo avo oule woivike ili itatu, okudja petameko la Kotoba ofiyo omomafiku  21 ohani ei.

Omadeulo oludi eli mo Namibia okwa kala ashike haa yandjwa kendiki eli lili ko Walvis Bay, naashi osho oshikando shotete omadeulo aa taa yandjwa okudilila mendiki lo mo Lüderitz.

Endiki lo NAMFI olina oshinakuwanifwa shoku yandja omadeulo, kombinga ye ameno kovanailonga vomefuta.

Ovanailonga oha va deulwa nghene vena okukwafela nokuxupifa ngeenge paholoka oshiponga mombautu omanga veli moilonga mefuta. Ohava pewa yoo omadeulo  okuyowa.

Omadeulo oo hava yandje, ohaa kala ena sha neameno, nghene vena okuxupifa ovanhu ngee ombautu oya mono oshiponga, ile  tai ningine, ohava longwa nghene vena okuxupifa ovanhu ovo velimo, ile ombautu ngee oya hovele okupya, ile mombautu omuna omunhu a ombokelwa, ohava deulwa nghene vena oku unga unga nomunaudu oo fiyo ta fiki komutunda opo a dule okutwalwa koshipangelo.

Endiki lo NAMFI mo Lüderitz ola yeulula omivelo dalo modula 1996, ashike nande ongaho omadeulo okwa kala ashike haayandjwa Kendiki eli lakula lili ko Walvis Bay, moLüderitz omwa kala ashike hamu yandjwa omadeulo opetameko.

Omukwatakanifi wendiki loNAMFI mo Lüderitz, Brigitte Fredericks okwa tumbula kutya Endiki lo NAMFI mo Lüderitz ola longwa nokutulwa oilongifo aishe tai pumbiwa, onghene eli paife ola yeuluka okuyandja omadeulo aeshe taa pumbiwa kovanailonga vomefuta.

Fredericks okwa ti ombelewa yaye oye lipyakidila nomalinyolifo, ovanailonga vomefuta, noshivike shaya ovanyolifa nale nokuli ovanhu veli 130, ovo tava ka mona omadeulo moule woivike itatu twa finda.

Fredericks tatu omukumo ovanyasha unene tuu ovakainhu va kufe omaifano oilonga yomefuta.

 

LEAVE A REPLY

Please enter your comment!
Please enter your name here