Waa pandula no yaka

0
184

ONYUULAE –  Aakwanegongalo yegongalo Etegameno oyali ya talelwa po kuKansela gwoshikandjohogololo Okankolo Hans Nambondi, noku ya etela omagano.

Sho a pewa ompito opo a popithe oshigwana she, Kansela Nambondi mepopitho lye okwa li a yelitha kutya okwa kwatwa kohokwe opo a landele aakwanegongalo iipundi, yo ya kale taya kuutumba ya manguluka.

“Onda kala ethimbo handi gongala megongalo ndika, ashike onda kwatwa komadhiladhilo opo ndi landele aanona iipundi. Oshoka aanona mbaka olundji noopompito kehe ohaya kuutumba pevi naa shino osha  penduthile ndje omadhiladhilo opo ndi kuthe mushoka ndina ngame ndi longe oshilonga yakulo,” Nambondi ta ti.

Okwa gandja iipundi yaanona yili ethele (100), mbyono ta ti otayi kala tayi kuutumbwa kaanona pethimbo lyelongelokalunga nenge uuna ndoka puna iituthi niinyangadhalwa yilwe.  Iipundi mbyoka okwa li eyi gandja pethimbo lyetalelopo ndyoka montaneho yaakwanegongalo mboka yali ya holoka esiku ndyoka.

Kansela Nambondi okwa kumagidha aantu mboka yena ya gandje omakwatho nomayambidhidho moshigwana, ta ti itashi kwatha sha wu na oshindji ngoye itoo utha onyala wu gandje sha tashi zi mwaashoka wuna.

Omusita eli moshipundi shevululuko Sakaria Ambunda, ngoka oye ali a ningi elongelokalunga esiku ndyoka okwa li a taambako iipundi mbyoka yaanona pamwe naanona mboka yali ya holoka osho wo aavali.

Ambunda okwa pandula kansela gwawo sho ta longo noku yakula oshigwana. “ Otwa hala okupandula kansela gwetu sho a mono shoopala opo a kuthe pushoka ena ye a gandje moshigwana, okwa longa oshilonga sha simana naanona yetu ngaashingeyi otaya kala haya kuutumba kiipundi, yo ya kale haya uvu nawa omambo,” Tatekulu Ambunda ta ti.

Okwa ti aanona yomegongalo moka oya kala haya kuutumba pevi, ihe ondjodhi yawo oya ningi yoshili sho ya mono iipundi konima yoku kala ethimbo ele taya kuutumba pevi. Nokwa endulula olupandu lwe nolwegongalo molwomagano ngaka.

Okwa indile aantu ya kale taya pandula uuna ya longelwa iilonga tayi opalele, ta tumbula ngaashi omukulu gonale ha tumbula ta ti “Waa pandula noyaka”, ta halele kansela omayambeko, ye a kale ta dhimbulukwa woo yalwe koombinga noombinga.

 

LEAVE A REPLY

Please enter your comment!
Please enter your name here