Eendjila nadi tulwe omafano

0
109

Omolwa oiponga oyo ya hanya neenghono, ehangano loRoad Authority ola pumbwa oku li tula mo neenghono oku fya oshisho kutya keshe onhele oyo ya talika ko ya nyika oshiponga oya tulwa omadidiliko a twa oo taa londwele ovalongifi vondjila ovo tava piti ponhele opo.

Imwe yopeenhele opo opOshali nOniimbwele opo pa kanena eemwenyo dihapu, nopa lemanena ovanhu vahapu.

Ngee owa tale mondjokonona yoiponga oyo hai ningilwa pokati kOndangwa nOnathinge, pOshali nOniimbwele opo ponhele imwe yomeenhele domoshilongo odo di na ondjokonona yoiponga inyanyalifa.

Shimwe shomoiponga ya ningilwa opo osha ningwa onghelainya komatango omo eloli nobaki yeli denga omutwe nomutwe mumwe. Pefimbo opo Kundana aya kokunyayangida, omushingi wobaki okwali taku hokololowa a mona oshiponga shinyayalifa nokwali a twalwa koshipangelo.

Kakele kwaasho, shimwe shomoiponga tai difa omaxwilili sha ningwa omafiku aa, osha ningilwa natango ponhele opo tuu opo, eshi otuwa yoToyota Double Cab noToyota Prado natango deli denga mumwe omutwe nomutwe. Oshiponga eshi osha komba po ovanhu aveshe vane ovo vali va pambafana, tashi lemaneke vane mwa kwatelwa nounona vanini.

Ngeenge nee oiponga ota i twikile nomukalo watya ngaha ndele eenhele odo di shivikile oiponga oyo tuu oyo ita pa ningwa elunduluko lomeendelelo, oshiwana ota shi ka pwa po.

Vati opena ngaho efaneko opo opate yopokati kOndangwa nOmuthiya ika nenepekwe, koo ku yandwe omukalo wokushinga oituwa tai pingafana. Eudaneko eli lepangelo pamwe nehangano leendjila loRoad Authority oli wa shili neenghono, nota li ka kwafa mokuyanda oiponga ihapu. Hano okutotapota po eepate dinene odo oituwa ita i kala vali tai pingafana osha pumbiwa okuningwa moshilongo ashishe shaashi ihapu yomoiponga oyo tai ningwa moshilongo oyo yo yoituwa yeli denga mumwe, oshipala noshipala.

Ashike ngeenge owa tale, omalongekido oku nenepaleka opate oyo inaa tameka natango. Atushe otu shi shi kutya eepoloyeka depangelo oha di kwata efimbo noule opo di tulwe moilonga. Omanga nee taku longekidwa opo eepate di tungululwe, omolwashike mbela Road Authority ita tula po omafano, a fa naanaa oo eli kopate oyo ya yuka keedoolopa dokomunghulofuta oku kunghilila ovalongifi vondjila?

Vali, nande nee ngeno ponhele yonhumba opa kale pehena omafano, eendalaiva oda pumbwa oku kala dina oshisho sha wedwa po nokukala alushe da pashuka ngeenge ta di ende peenhele odo di shivikile nawa oiponga, nande nee opa kale pehena omafano elondwelo.

Oiholelwa oihapu unene momesho nomomatwi nomomesho etu. Shaashi efiku nefiku oikundaneki ota i kundaneke shina sha noiponga oyo tai ningwa, ashike ita tu lundulula. Eendjila oda nyika shili oshiponga ashike fye onga ovalongifi vomeendjila nafye otu na oku ninga po sha opo tu li amene.

Oiponga imwe ohai holoka shili, shaashi pena oshiponga shali shina okuningwa ashike opena imwe tai dulu oku yandwa.

Oiponga imwe oha i holoka shaashi umwe womovashingi ile aveshi vomovashingi voituwa va shinga nai. Unene tuu ngeenge omunhu ile ovanhu otava shingi onhapo ya pitilila. Na luhapu, onhapo yoshituwa oha i monikila komunyonena oo wa ningilwa oshihauto. Ita shi ti oshiponga keshe shi nyanyalifa tashi holoka oha shi etwa kokushinga nouhasha, ashike ihapu yomoiponga ohayi etwa kokushinga nouhasha.

 

LEAVE A REPLY

Please enter your comment!
Please enter your name here