A fya konima yolwoodi

0
214

 

ONGWEDIVA – Opolifi otai konaakona oshiningwanima omo omulumenhu omunamido 33 a hangwa a fila ponhele yomatungo ili pomukunda Oshipala moshitukulwa Oshikoto.

Ouyelele oo wa yandjwa komupedu komanda wopolifi mOshikoto Deputy Commissioner Naomi Katjiua otau ti, omulumenhu ou wedina Leonard Uukongo a dile komukunda Oshoopala okwa hangwa a fila pokamba yedina Octagon Construction ili momukunda Oshipala mOnakazizi.

Uukongo vati okwa li ha logo pokamba opo, a li a kutwa onga omunailonga womomatungo. Olutu laye ola monika kuvakwao lwopo 13h00 mEtivali loshivike eshi.

Nonande Uukongo ina hangwa ena nande oshipute shasha kolutu, Katjiua ota ti okwa hangwa ta di ohonde komayulu nokokanya. Katjiua ta weda po yo kutya opolifi oya mona po ouyelele kutya Uukongo okwa monika ta lu navakwao vamwe mOmaandaha a landulwa kefiku olo a hangika a fya.

Katjiua ta ti omakonaakono opolifi otaa twikile, noshidjemo shekonakono lomudimba ota shi ka holola oshietifi shefyo. Ta ti oshidjemo shomakonaakono osho tashi ka ulika ngeenge opolifi ota i ka tula omunhu moipandeko ile ahawe.

LEAVE A REPLY

Please enter your comment!
Please enter your name here