Kauluma a tula ondhopi kongeleka yaLukonda

0
235
Aakwanegongalo mongeleka ndjoka ya li ya tentekwa ondhopi kOmukwaniilwa Imanuel Kauluma Elifas Osoondaha ya yi.

 

OLUKONDA – Egongalo Olukonda olili metifa lyokutunga ongeleka ompe, ongeleka ndjoka nonande ya tamekwa okutungwa, otayi pula oshimaliwa oshindji opo yi kale yapwa thilu.

Omukwaniilwa gwaNdonga tatekulu Immanuel Kauluma Elifas  pamwe nomalenga ge osho wo ezimo lyaawa Osoondaha ya ziko oya li ya yamukula kompumbwe yegongalo lyaandjawo.

Shino osha   ningwasho Omukwaniilwa a tenteke ondhopi ye oshikando shotango lyo etungo lyongeleka lipwe thilu. Osheendo shOmukwaniilwa osha li sha kwatelwa komeho kuye mwene, omunyekadhi goshilongo, aawa, omalenga na yalwe woo mboka yali ye ya okumu  wayimina wa metuloko lyondhopi ye.

Osoondaha ndjoka egumbo lyuuwa olyali lya gandja oshimaliwa shi thike pooN$114 0000,  lwaampoka. Elenga enene moshikandjo Onalusheshete Eino Shondili okwali a yelitha kutya elalakano okutunga ongulu yOmuwa yo yi kale yapwa thilu mono tamu kala tamu gwanene aakwanegongalo ayehe.

“Elelo lyopamuthigululwakalo olya wayimine ehiyo lyOmukwaniilwa, tse tu koleke omadhiladhilo ge okugongelela ongeleka yo yipwe mbala, shino otwe shi ningi shaza komitima dhetu  oshoka otwa hala etungo ndika li kale lyapwa nziya,” Shondili ta ti.

Pethimbo ali a gandja oshipopiwa shOmukwaniilwa Fillemon Shuumbwa Nangolo okwa ti otaya lalakanene ombili, engungumano, uuthikilo nesindano, ta ti oya hala woo aantu ya kale yena eitaalo neinekelo lya kola, yo taya topolelathana iilonga ya vule okuthikamithapo oteempeli yOmuwa.

Aakwanegongalo oya kwata onyati noku gwanithapo shoka ya inekelelwa, yamwe yomaakwanegongalo oyali ya gandja iimaliwa esiku ndyoka. Mboka ya gandja ongaashi Andreas Nuule ngoka eli omukwanegongalo Olukonda, a gandja oshimaliwa shi thike pomayovi ethele.

Esiku ndyoka opwa gandja woo iimaliwa kaanangeshefa naakwanegongalo oyendji oya gandja oongombe, iikombo na kehe shoka tashi vulu okukwatha ketungo lyongeleka ndjoka. Omusita ta wilike egongalo ndyoka Simon Itula okwali a yelitha kutya etungo ndika lili metifa olya tamekelwe okutungwa pehulilo lyomumvo gwa ziko , nokwa thanekwa li kale lyapwa nziya nuumvo.

Itula okwa pandula aakwanegongalo sho ya ulike eitulemo lyawo miilonga yokutunga ongeleka ndjoka. Ta ti ongeleka ndjoka haya longitha pethimbo ndika oshona unene naakwanegongalo ihaya gwanamo pethimbo lyomatango omanene, nolundji ohaya uvile omambo pondje. Ta ti otaya kala taya ningi egongelo lyoshimaliwa, yo ya kwashilipaleke kutya etungo ndyoka lili pamuthika gopashinanena olyapwa, yo ya gandje etumwalaka kaantu yaKalunga.

 

 

LEAVE A REPLY

Please enter your comment!
Please enter your name here