Ompumbwe yoshimaliwa ya gumu uupate woongalama

0
175

 

Ongwediva

Oondjila dhevi muumbangalantu woshilongo odha ninga uupyakadhi neshongo enene kookansela dhiikandjohogololo osho wo kaakwashigwana naalongithi yadho.

Mbaka oya ulike kutya oondjila ndhika odha fa itaadhi longo we shoka dha tungilwa po  molwashoka ndhika ihadhi silwa we oshimpwiyu nawa.

Omukuluntu gomakwatathano moshikondo Shiilonga Niiyenditho, Julius Ngweda okwa zimine kutya opena shili  oshiimbi pashimaliwa shoka osho tashi keelele nenge tashi imbi opo omayakulo goku opaleka oondjila ndhika ga ningwe ethimbo alihe ngaashi naanaa sha pumbiwa okuningwa. Ngueda okwa ti ita tsu kumwe naamboka taya ti oondjila ndhoka ihadhi silwa nando oshimpwiyu shimwe shimwe.

“Oshili oondjika kutya molwompumbwe yoonzo  ekalekepo lyoondjila lyopamuthika gu uthwa iha li popiwa we naanaa. Molwashoka oshimaliwa inashi gwana ehangano lyoondjila, Roads Authority (RA) ohali longitha ashike oospana dhili ne dhoku opaleka oondjila ndhika adhihe moNamibia alihe. Opo andola ndika li vule okuopaleka ondjila kehe oospana dhoku opaleka oondjila dhongalama odhi li ashike ne oshilongo ashihe , omanga kwa li kwathanekwa kutya kehe moshitopolwa omuna okukala ospana yoku opaleka ha yi ithanwa Gravel Replacement Units (GRU),.Kehe nee ehangano eyopaleki andola otali kala nee tali longo moshitopolwa shoka.O GRU kehe oyina okuopaleka oondjila dhoshinano shuule wookilemeta 120 komumvo kehe.

‘Ompumbwe yomashina goku opaleka ndjika oya kwata [Road Authority] RA noku mu thiminika opo ashike a tokole oku opaleka oondjila ndhoka hadhi endwa komahauto ogendji okuyeleka naandhoka kudho haku ende ashike nando oohauto ngapi ngapi mesiku.Ndele okwa kwashilipalekek kutya oonkambadhala otadhi ka ningwa opo oondjila adhihe ndhika dhi kale hadhi opalekwa opo dhi vule okulongithwa kiiyenditho.,” Ngweda a uvaneke.

Ookansela yiikandjohogololo mboka ya popi na Kundana oya ti onkalo yoongalama pethimbo ndika  ota shi vulika yi shi ninge oshidhigu opo omahala gamwe ga kale ishewe itaaga vulu oku adhika molwa shoka oondjila okuya hoka odha yonuka.Utya oondjila dhimwe nookuli ihadhi vulu we okulongithwa naanamahauto oya tsamo dhawo mooha dhuupate mbuka.

Miikandjo ngaashi Omuntele mOshikoto, nUukwiyuushona mOshana omahauto oga tameka okugundila mevundungwa ndyoka lya ninga ele moondjila ndhoka.Oshikwawo evugu olya ngambeka uutuukala opo kaawu vule we okulongitha oondjila ndhoka.

Kansela gUuvudhiya Amutenya gwaNdahafa okwa ti okuna uumbanda kutya oshitopolwa shimwe shomoshikandjohogololo she otashi ka kala shaana ekwatathano niitopolwa iikwawo mOshana omolwoondjila ndhoka dhaali nawa.

GwaNdahafa okwa ti okwa lombwela o RA poompito odhindji ndele ina pewa nando eyamukulo tali mu nyanyudha sigo oompaka.

Kansela gumwe mOshana ngoka inaa hala okwi ipopya okwa ti na ye okwa lopota onkalo yoondjila moshikandjo she  ihe sigo oompaka inapa ningwa sha .

“Moshitopolwa shOshana omuna omambakumbaku goku heya kopate geli ga hetatu, ndele ngaka ihaga longo sha oshoka anuwa kapena omahooli okuganwetha opo ga ye kiilonga yoku opaleka oondjila moshitopolwa. Otu uvite kutya ehangano lyoRCC (Road Construction Company] kali na oshimaliwa shomahooli’kansela oshilyo shokommittee yehumokomeho mOshana kombinga yoondjila a ti.

Ngweda okwa ti oondjila adhihe dhi shiwike pambelewa ohadhi kalekwapo ku RA niimaliwa okuza kepangelo osho wo niimaliwa hayi zi ko Road Fund Administration (RFA) mbyoka hayi futwa kaa longithi yoondjila moshilongo

Ina vula okupopya kutya iimaliwa ingapi oholomende hayi longitha moku kalekapo oondjila dhongalama.

Ngweda okwa ti epangelo olyo hali gandja iimaliwa  yokukaleka po oondjila adhihe ngaashi shuuthwa komulandu gwokommissie yOmathaneko gopashigwana.

Ngweda ina tinda nenge a koleke kutya omambakumbaku gokugradinga geli gahetatu oga thikama moshitopolwa shaShana itaaga heya oopate ndhoka molwaashoka kagena omahooli. Okwa ti oRFA otayi konakona oshinima shika na opena ompito opo oongundu dhoku opaleka oondjila dho gravela dhi indjipalekwe sigo opoongundu hamano omumvo gwiimaliwa tagu landula.
Eindjipalo momwaalu gwo GRU otali  etapo ehwepopalo  moonkondo dho RA opo yi vule oku kalekapo oondjila dhongalama dhili nawa tadhi vulu okulongithwa.Ngweda a ti.

 

 

LEAVE A REPLY

Please enter your comment!
Please enter your name here