Omukulu wetu okwe tu lekela manga inaa fya

0
403

 

“Moshito ngeenge eli mokafudo, ihe ya ko naana koflata yetu etu talele po shaashi oha kala ta longo oilonga yaye yopaumwene. Ashike Olomakaya la tetekela exuliloshivike olo va xulifa, okwe uya kufye, tetu landele okunwa, ndele hatu tale navo oudano wetanga. Omanga ina ya okwa ya moskopa yetu ndele ta kufa mo okambidja, vati iha tu mu pe sha,”

Edi oda popiwa kuMatheus Mafita okandenge ka nakufya Martin Andisaari Mafita, oko ke wete kutya omukulu wako okwa va lekela omanga ina xulifa.

Martin Mafita oye a li ta shingi, eshi ye pamwe novakwapata laye vatatu va fila moshiponga shohauto osho sha ningilwa pomukunda Oshali. Ehauto laMartin Mafita lodouble cab, ole li denga mumwe notuwa tai shingwa komusamane womukulunhu oo vati ali ta henuka eengobe mopate.

Meenghundafana naKundana, Matheus Mafita, okwa hokolola nghee mumwaina ali e ya okuva talela po oshivike sha landula opo a ka xulife, nonande a li a ninga efimbo lile ine shi ninga.

Martin Mafita okwa li oiginia yeembautu, a li ha longele ehangano ledina Marshall Fishing Company. Ngeenge a di mo mefuta, oha kala elipyakidila noilonga yaye yopaumwene yokupangela eetuwa deeBMW. Omolwa oilonga yaye Martin Mafita ina kala naanaa ena efimbo lokutalela po.

Martin Mafita (36) okwa xulifila pamwe navamwainagona, Hilma Shikalakuti (46) oo a li omupolifi koWalvisbay naFrieda Wilbard (35) ali ha longele Municipality waWalvisbay nokamonamati kaye koshiveli Tomas Cole Mafita (11).

Nakufya Frieda Wilbard oo vati a hangwa ashike opo a lande eumbo laye moWalvisbay nokwa hangwa ashike opo teke li nangala, okwa fiya ko ounona vaye, oukwanambwiyu, omanga meme Hilma Shikalakuti a fiya po ounona vaye vatatu.

Matheus ta ti epako laava ola tengenekwa likale ko nena (mEtitano). Tati, Nakufya Mafita noshiveli shaye nameme Shikalakuti otava pakwa pomukunda waavo pOuhongo waMafita, omanga nakufya Frieda Wilbard taka pakwa koWalvisbay oko kuna ovadali vaye.

Moshiponga omo omwa xupa omufiyekadi wanakusa Mafita meme Selma Mafita, nounona vavo voukadona vavali kamwe okena eedula nhatu, nakakwao keemwedi hetatu. Mafita nomukadi ova hangwa opo va hombolele mo2012. Moshiponga omwa xupa yoo omukainhu womunyasha oo ali ha file oshisho ounona.

Onghalo yameme Selma nounona nomuleli wounona otaku ti wa ota i enda ya yuka kouwa. Ofamili ei oyali tai di koWalvisbay ya yuka kohango oyo ili kOuhongo waMafita mongula.

LEAVE A REPLY

Please enter your comment!
Please enter your name here