Ooskola adhihe mOshana konyala odhina olusheno

0
173

ONGWEDIVA

Kansela gwoshikandjohogololo Ongwediva ota ti konyala omanongelo agehe moshikandjo she oga tulwa omalusheno.

Ndhika Andreas Uutoni okwe dhi tomona moonkundathana na Kundana omasiku ngaka a ti omwa thigala ashike oosikola mbali odho inaadhi pewa olusheno. Ndhika odho Panduleni Primary School osho wo nee Iidhiya Combined School. Pahapu dhe itashi ka kwata olule opo ndhika dhi kale dha mona uuyelele unene tuu Panduleni, mpoka iilongitho ayihe yolusheno ya tulwa nale momatungo.

“Iidhiya Primary School oyi li moshikandjohogololo shandje, ihe kombinga yokuwilikwa melongo oyili kohi yoshikandjohogololo Okaku. Onda kundathana omathimbo gapiti nomukuluntusikola naalongi osho wo aalongwa mboka ya ti osikola ohayi longo nawa na otayi ka longa nawa sha pitilila ngele andola oyi tulwe olusheno.” Uutoni a ulike.

Uutoni okwa gandja epandulo netumbaleko komutetekeli gwe Vinia Abisai, ati nguka okwa li a longo nuudhiginini molwashoka oosikola odhindji odha li dha tulwa olusheno pethimbo lye wiliko lye. Uutoni okwa ti opena wo omahala guusitola uushona noshowo omandiki goongeshefa mpoka aanangeshefa taya vulu oku itungila onkalamwenyo dhili nawa ndele iilonga yawo otayi yiwa moshipala sho pomahala mpoka inaa pa tulwa omalusheno.

“Otwa futa nale oodola omayovi N$332 000 kuNored opo a tule olusheno puundingosho wopOmwoongo waNamutai.

“Otandi dhiladhila kutya nuumvo Oshikandjo shandje nOshikondo Shoomina nIikwankondo otaya ka topokathana molwashoka omahala agehe goshigwana oga tulwa omalusheno naashika otwe shi pandula noonkondo” osho a ti.

Kakele kolusheno , Uutoni okwa ti uule woomwedhi omulongo nayimwe dhelelo lye ye okwe shi pondola  okutala sho ondjila ya tungwa oku kwatakanitha  osikola ya Panduleni Primary School nongalama yevi oya manithwa.

Okwa ti osikola ndjika oyi momufithu guna evugu ele ndyoka lya thiminike opo aalongi aluhe ya thige iihauto yawo ya thikama kokule konyala oometa omathele ga 600 okuza penongelo ndyoka.

Ndele shika ngashingeyi oshinima oshikulu nookuli.Uutoni okwa tsikile a ti okwa etithapo ehala lyokukwatela openzela pendiki lya Benjamin Shiteni ndyoka wo lya opalekululwa omathimbo ngaka.

Okwa ti  limwe lyomomathaneko ge olyo okusoshimpwiyu kutya aakokele moshikandjohogololo she oye na omahala goku kwatela openzela geli nawa. “Ngele owa yi komahala goku kwatela openzela oto eta ohenda oshoka aakuluntu yetu otaya kwatele owala openzela yawo ye li momikweyo taya si omutenya. Yo ishewe kaye li nando omegameno lyasha,” Uutoni a ti.

Okwa it omahala goku kwatela openzela gaali moshikandjohogololo she  otaga ka tungilwa omahala gomunzile.Iipeleki oya landwa nale nomahala ngaka oga tothwamo nale. Kansela gwaNgwediva okwa ti kutya etungo lyoondjila moshikandjo she olili limwe lyiinima mbyoka a hala ya longwa oshoka ompumbwe yoondjila oyo shimwe shomashongo ga taalela oshikandjo shika.

“Oshikandjo sha Ngwediva oshina oshigwana shaantu yeli omayovi konyala 32 265 yo ayehe mbaka ohaya longitha ashike oondjila mbali dhomoshitopolwa adhike.” Osho ati.

Ongwediva oyi na ashike oondjila dhomoshikandjo dhili mbali yimwe yaza puAdolf  naandjoka yaza kOkatana dho ndhika odha tsakanena pOnamutai noku ninga ondjila yimwe ya ya kOngha dho ndhika inadhi tulwa oteya natango. Uutoni okwa ti ota kala noku kondja opo oshikandjohogololo she shi mone oondjila dhili nawa.

Uutoni okwa ti ita kondjele ashike aakalimo moshikandjohogololo she mboka yeli komikunda ndele ota kondjele wo ayehe naamboka ye li miilando mbyoka yili oshitopolwa shOngwediva.

Okwa ti ombelewa nando kayi na sha negandjo lyoondjila , omalusheno osho wo oshikukuta kaantu mboka ye li momalukanda. Ye ongoshilyo shokommittee yehumokomeho miilando oha kwathele ookansela ooyakwawo mbaka miilando nomathaneko  ngoka taga vulu oku kuthapo omikundu ndhoka dha taalela aakalimo miilando.

 

LEAVE A REPLY

Please enter your comment!
Please enter your name here