Aanahambo koAmarika otaya gwile momithima

0
194

 

AMARIKA- Mwene gwomukunda Amarika Amutenya Salomo okwa ti okwa piyaganekwa komaso gaanahambo  momudhingoloko gwomukunda gwe.

Salomo okwa ti olundji aanahambo mbaka otaku lopotwa ya sile momithima dhomeya moka haya nwetha iimuna yawo.

Mwene gwomukunda nguka okwa ti oshoka momadhiya omwa hupwa omithima odhindji oku konga omeya okunwetha iimuna, ndhika odha ninga oshiponga oshinene, sho ngashingeyi aantu uuna taya ende uusiku ohaya haluka ashike ya gwila mo momithima ndhoka.

Omupopiliko gwopolisi moshitopolwa shaMusati Lineekela Shikongo okwa ti aakwashigwna yAangola yaali oya lopotwa ya si sho ya gwile momithima dhomeya koohambo moshitopolwa omo tuu moka.

Okwa ti mbaka yaali oyali ya adhika ya sa momeya moka mehulilo shiwike lya ziko pOkeendjupa koohambo dhoko Amarika .

Shikongo okwa ti anuwa mbaka yaali oyali taya hupu omuthima sho ya thenunukile mo nokusa.

“Omidhimba dhawo odhali dhi itsuwa kaanahambo ooyakwawo mboka konima ya tseyithile opolisie yaKahao ndjoka ngashingeyi oyo ya siikilila omidhimba ndhika,” Shikongo a ti ngaaka.

Okwa ti nonando mbaka oya adhika ya sa momeya osheetithi sheso ndika shomondjila inashi tseyika oshoka iizemo yetando lyomidhimba ndhika inayi pitithwamo natango.

Aakwanezimo lyoonakusa mbaka inaya tseyithilwa natango oshoka eefamilia dhawo odhili ko Angola.

 

LEAVE A REPLY

Please enter your comment!
Please enter your name here