Eyelifilo kombinga yokankera koilyo yoidalifi yovalumenhu

0
136

 

ONGWEDIVA – Oshipangelo shopaumwene Medipark mOngwediva otashi ningi omakonaakono okankera oshikando oshititano  koilyo yoidalifi yovalumenhu mEtitano loshivike tashiya poYouth Centre yaMuthiya moshitukulwa shaShikoto.

Ouyelele wa yandjwa komunambelewa omupopiliko woMedipark mOngwediva Otto Amputu, kutya elalakano okuyelifila oshiwana shi shiive oupyakadi wokankera koilyo oidalifi yovalumenhu nokudimbulukwa omukifi ou momwedi ou pamwe naavo tava lumbu nokankera ei.

Amputu ta weda po kutya, oneudo oya pewa oshipalanyole “Ohatu shi dulu. Naame ohai shi dulu.” Onghendabala yowina ei, okupashula oshiwana shi shiive omivalu daavo va kwatwa  nonghee omukifi wa nyika oshiponga moshiwana.

Ekonaakono pamukalo womalolelo ola tamekwa nale moitukulwa ya yooloka meedula da dja ko, la tamekwa tete moshipangelo shaMedipark moshitukulwa shaShana neendokotola oda mona kutya ekonaakono lovalumenhu oli na okuningwa mefiku la yooloka kwaali lovakainhu. Omakonaakono okwa twikila fiyo okoshipangelo shaIndira Ghandi moshitukulwa shaMusati, moMedipark 2014, kEenhana moshitukulwa shaHangwena 2015 noneudo2016 okOmuthiya moshitukulwa shaShikoto.

Ekonaakono otali ningilwa ovalumenhu veedula okudja po 50 sha finda pombada.

Namibia naye oshimwe shomoilongo nayo ya kumwa keekankera domaludi mounyuni. Ouyelele wa dilila kokapangelo komakonakono kwaavo va ninga oihakanwa yokankera Oncology Clinic moWindhoek, owa yelifa kutya, Namibia oku li oshihakanwa sheekankera domaludi eekankera nhano di li pombada.

Oshidjemo shekonaakono osha holola kutya, ovo va kwatwa kokankera yokevele moNamibia ove li 467, okankera yokoshipa 386, Kaposi Sarcoma 311, okankera koilyo yoidalifi yovalumenhu 311, koshivelo shoshidalelo 266 omivalu oda ulika di li pombada onghee oshiwana osha teelelwa shi kufe ombinga mekandeko lokankera.

Ovalumenhu itava dulu ku konaakonwa oshita novakainhu omolwa omukalo wavo wokuhamanguluka mokupopya oipambele yavo nomikifi davo. Amputu ta weda po kutya, fiku lomakonaakono ovakainhu kombinga yokankera yokevele nokoshivelo shoshidalelo pOmuthiya okamwaalu kaniingholi kovakainhu ka findikilwa komakonaakono kovalumenhu vavo, ashike omwaalu wovalumenhu tave ya komakonaako  okankera koilyo yavo owa enda nokutana moule weedula mbali da dja ko.

Amputu ota shivi ovalumenhu moitukulwa ikwao va fike komakonaakono owina ovalumenhu veedula da fika po50. Ta indile ovalumenhu va kale ovamanguluki mokupopoya oipambele youkolele wavo.

 

LEAVE A REPLY

Please enter your comment!
Please enter your name here