Marine Phosphates kaishi oudiyo –Kapwanga

0
187

KuTuulikki Martha Abraham

Lüderitz – Omukulunhu wehangano loLL Namibia Phosphates Kombadayedu Kapwanga kwati okuudite kutya osha puka eshi oikundaneki imwe tai tandavelifa omipopyo kutya ophosphate “oshimongwa shoudiyo” nande voovene ove shishi kutya hasho.

Kapwanga a tumbula eudo nai laye meenghundafana nomutoolinghundana waKundana oshivike eshi moLindili.

Kapwanga novanongononi mehangano loLLNamibia Phosphate ova ti omarine phosphates edu lonhata, olo hali dulu okufipwa mefuta noku etwa komutunda oko ta li uya okulongelwa, nokutulwa yoo ongushu opo lidule oku ka longifwa, moilongomwa ya yooloka moshilongo.

Onhata ohai uya nee i kufwe mo po tapa shaala edu eli lina oshikwamina ili oshimongwa eshi sho phosphate. Edu eli ihali hengumuka nande ngaashi omongwa shaashi ngeno ola hengumukila mefuta nale nale.

Nongeno okwali lina oudiyo ngeno eeshi odafya nale nande edu olo inali fipwamo.

Ova ti eshi kashina nande oushili shaashi kapena apa pwa udika ophosphate ya yandya oudiyo washa keeshi, koimuna ile kovanhu.

Eepela edi hadi nuwa nge omunhu ta vele oda ningwa  mo phosphate. Oikulya ei haiyandywa koimuna (Lek) nokeexuhwa ophosphate. Omakipa omunhu nomayoo okwa shitwa ku Kalunga mophosphate. Osho va fatulula ngaho.

Onghee otava fatulula kutya ophospahtes yomefuta kai fi oudio nande nande, ndele edu lonhata la pumbiwa, tali kufwa mo ashike mefuta lili ngaashi lili.  Edu lonhata ola dilaadilwa nee li etwe komutunda, oko taliya okulongelwa, paenghatu da yooloka fiyo tali eta eefabrika dilili nodilili moshilongo.

Efatululo eli ove wete otali kwafa ova kwashiwana vahapu, va ude kutya oshimongwa eshi shophosphate hai di mefuta oshike naanaa.

Ova fatulula kutya edu lonhata olo ngee ola pu okulongwa, ohali longifwa oku ndulukapo omiti dokuhakula, ohali longifwa yoo oku tulwa moikulya, oshoyo meefewa doku wapaleka, noku longifa yoo onga oushosho moikunino yoimeno.

Ova tumbula kutya ophosphates oya pumbiwa, na oina oshilonga sha fimana shaashi oyo ya kwata eemwenyo dovanhu, doimuna nodoimeno, onghee ngenge kaipo oinima aishe otaifi.

“Ou yelele oo twa hala ufike ko shiwana oo ashike oo kutya omarine phosphate edu lonhata lomefuta, nongeenge, omahangano aa a hala oku kufa edu olo mefuta okwa pewa, oufemba, otaa ka kufamo ashike edu lonhata, loo tali uya nee lishekwe nokulongelwa komutunda”, osho Kapwanga a tumbula.

 Omarine phosphate ya yoololwa nale mumwe nedu noku kukutikwa.
Omarine phosphate ya yoololwa nale mumwe nedu noku kukutikwa.

LEAVE A REPLY

Please enter your comment!
Please enter your name here