Ogout oshike?

0
227

Gout omukifi wopomashakeneno omakipa (arthritis), nohai dulu okueta ouvela meendelelo ile mefimbo lixupi. Ogout ohai eta yo okukukuta nodindo pomashakeneno omakipa, hano pomatifukilo olutu mwa kwatelwa eengolo, unene tuu poungolo vomunwe wa kula womhadi.

Ouyehame ou ohau dulu okuuya woo tau shuna oikando ihapu. Eshi oha shi dulu nee okuetela omashakeneno omakipa oshilyo sholutu shonhumba oupyakadi, nosho yoo omakipa neenhumba odo dili popepi nonhele oyo.

Ogout ohai etwa koshike?

Ogout ohai ya ngeenge omunhu ena oshimongwa shouric acid shihapu unene mohonde. Haalushe omunhu ena ouric acid ihapu mohonde ha kwatwa koupyakadi ou. Hano ovanhu va hapu vena oshimongwa eshi ihava kwatwa naanaa kogout. Ashike ngee ouric acid mohonde yoye oya londo pombada unene, oha yi dulu nee okukukuta ndee tai kala yafa oukende tava twana va honga, ngaashi shili mefano lashikula ko.

Omhito yomunhu a kwatwe kogout oili pombada unene ngeenge; omunhu oo ena oshiviha sha londa (a ondonka), hanu omalodu sha pitilila, ha li ombelela ihapu oyo ina oimongwa ha shi ifanwa purines. Omiti dimwe po ngaashi odo hadi ifanwa water pills (diuretics), nado ohadi dulu yoo oku tukulula ogout.

Omadidiliko ogout

Luhapu omunhu ena ogout oha kwatwa kouyehame wadiinina oufiku. Odindo oyo ohai kala pongolo ile potwikililo omakipa, ohai kala ya tilyana yoo oya pupyala. Eshi oha shi monika unene poungolo vanini ngaashi domunwe wakula wokomadi. Ogout ohai dulu yoo oku kwata omashakeno omakipa amwe elili ngaashi pomhando, ongolo yokuulu nosho yoo omatwikililo omakipa makwao.

Ouyehame wogout ohau dulu okukala po omafiku ile oivike yonhumba omanga inaau shuna pedu. Otashi dulika pa pite eemwedi ile eedula nokuli pokati keponoko neponoko lomukifi ou. Eshi otashi ti nee, omunhu oo ha kwatwa kogout na mone ndokotola efimbo nefimbo nande ouyehame naukale wa mwena po, shaashi oshimongwa osho shouric acid otashi twikile noku nyonauna eengolo doye nande ito ehama.

Ogout ohai monika ngahelipi paunamiti?

Ndokotola woye oteku pula omapulo kombinga youyehame ou una ndee teku konaakona mokukwataakwata eengolo doye nosho yoo okuku kufa ohonde oyo hai tuminwa kolaboratory ku talike kutya ouric acid yoye oili pombada ile oili nawa. Ndokotola woye ota dulu yoo okukutwa ongwiya mongolo ndele ta kufa mo oumeva a tale ngee ouna ouric acid ya kukuta ya ninga oukende ovo hava twana. Eshi ohashi kwafele okukwashilipaleka kutya heeno shili ogout oyo tai eta ouyehame oo ile ahowe.

Ogout ohai hakulwa ngahelipi?

Opo ouyehame wogout u shune pedu, ndokotola woye ota dulu oku ku pa ovenda yokushunifa pedu eponokelo logout, ile eku pe eepela odo hadi nuwa keshe efiku. Ouyehame ohau shuna ngaho pedu moule weevili 24, okudja pefimbo epango la tamekwa. Ngee omunhu a kwatwa/ponokelwa kogout, osha fimana opo ongolo oyo tai ehama ikale ya mwena manga itai longifwa unene, hano oya pumbwa oku fuwifwa po. Eepela ngaashi doIbuprufen ohadi kwafele mokushunifa ouyehame wogout. Ashike ino nwa nande oAsprin shaashi ohai eta ouric acid iye pombada mohonde.

Opo nee ouric acid mohonde yomunhu ena ogout ikalekwe pedu, ndokotola ota dulu oku ku pa omiti odo hadii shunifa pendu. Eshi otashi kwafa opo iha kale ya londa yoo i ete ouyehame wogout.

Omunhu ou ena ogout ota dulu ku li amena komaponokelo komukifi ou mokulya oitungifi yolutu ili mondjila, teli ameka koihape noingumutulu, nokulya ombelela inini. Osha fimana yoo opo omunhu a kotokele oshiviha shaye shiha kale sha londa unene, hano omunhu okwa pumbwa oku li keelela keondo la pitilila.

Omunhu atya ngaha ota pumbwa yoo okushunifa pedu okunwa omalodu, unene tuu eebiila. Ota pumbwa oku nwa omeva mahapu noku ninga omadeo olutu.

Caption; Omunduhotola Akutu Munyika, Onandjokwe State Hospital.

Dr Akutu Munyika

Specialist Surgeon

Onandjokwe Hospital

Ondangwa

 

LEAVE A REPLY

Please enter your comment!
Please enter your name here