Omunafaalama a tulululwa ta munu nawa

0
140

 

Omunafaalama a tulululwa okwa huma nawa komeho sho a longitha ofaalama yetulululo ndjika noku yi ninga ongeshefa tayi mu longele.

Michael Gariseb omunafaalama pofaalama Tsaobis moshitopolwa Erongo popepi nOmaruru okwa li omuniilonga mehangano lyoNamibia Air Ports Company, ngoka a ti nonando okwa taalelwa koshikukuta  osho wo oontamanana kombinga yoongamba ye ke uvite andola nayi sho a tokola okufaalama ethimbo alihe.

Omunamimvo 59 okwa ti etokolo ndika a ningi olyo “ Etokolo ewanawa nda kutha  oku kala omunafaalama oku udha. Ihe ndika kandali tandi vulu okuli  pititha inaandi kwathelwa kepangelo osho wo kaanafaalama yalwe mboka ya tulululwa.”

Gariseb pethimbo ndika ohamunu oonzi ndhoka dhi holike  dholudhi lwo Damara osho wo iikombo  yoludhi lwoBoer goat mbyoka yomitse omiluudhe nenge omitiligane. Kakele kiimuna omunafaalama nguka oha longo wo iimeno mbyoka ya kwatelamo omwiidhi gwolusiano osho  wo iihape yomaludhi ga yooloka mbyoka ye ha landitha koshigwana shomo mu dhingoloko.

Pahapu dhe ohokwe yuunafaalama oye ya mu ye konima sho he emu pele iikombo 17 oshoka ye okwa li a kulupa oku tsikila nokufaalama. ‘Ihe molwashoka onda li miilonga natango onda indile opo tate a kwathe ndje eyi kwatele ndje sigo uuna nda mono omusita. Elaka lye olya li  ongame ndina okuyi takamitha mwene oshoka ngashingeyi mbika oyo oshinakugwanithwa shandje.Pethimbo olyo tuu ndyoka onda tokola oku ethapo iilonga noku ya muunafaalama ethimbo alihe.” Gariseb a fatulula.

Okwa ti sho a tameke okufaalama ngaaka okwa kundana wo kombinga  yoskema yetulululo  yepangelo ye nokwa ningi eindilo. ‘Konima eindilo lyandje olya ziminwa nonda pewa ofaalama yoohektara dhili omayovi 2,300 momumvo 2011.

“ Sho ndeya mofaalama moka kamwali nando osha. Onda  tula oshitopolwa shandje mondhalate tandi opaleke oomboola dhomeya ndhoka dhili mo, ominino dhomeya osho wo tandi tungu iiyalo  yilwe ngaashi  omagumbo  nuu iyogelo. Osha li oshidhigu ndele onde shi pondola” Gariseb a gwedhapo.

Pahapu dhe kali ena nando ontseyo yasha yoku muna  osho wo okulonga niimeno kakele kuunongo mboka a mono kuhe. Okwa ti  oshiholekwa miilonga yuunafaaalama osho  okulonga nawa mongundu, okulonga nuudhiginini osho wo okutopola uuyelele nuunongo mokati kaanafaalama.

Kepulo kutya omolwashike ofaalama ye tayi humu nawa komeho nonando okuna oluteni, Gariseb okwa ti” Tse otwa valwa moluteni na otatu sile moluteni. Natu  dhimbulukwe aluhe oshinima shika noku shi kaleka momadhiladhilo getu, natu longe moku taaguluka shika  moku longitha ekwatho okuza kepangelo osho wo okukonga ekwatho kaanafaalama yalwe oshoka uuna tatu longele kumwe nena otatu tompola oshindji.”

Omolwa iilonga ye yuudhiginini Gariseb  okwa pewa onzapo  nooN$10 000.00  okuza kuMinista gwEopaleko lyEvi, Uutoni Nujoma oshiwike shayi  pethimbo lyoshigongi shuunafaalama sha ningililwe popepi nOmaruru.

Pethimbo Nujoma a gandja onzapo ndjika okwa kumike aanafaalama ayehe opo ya landule oshiholelwa sha Gariseb.

“ Tse otatu tululula aaNamibia nelalakano lyoku ya  nkondopeka opo ya  etemo sha momahupilo goshilongo. Otwa hala okumona aanafaalama oyendji taya yi komeho ngaashi naanaa  Gariseb a pondola okushininga pofaalama Tsaobis.

LEAVE A REPLY

Please enter your comment!
Please enter your name here