Oosipana koSecond Division inadhi futwa natango.

0
146

 

ONGWEDIVA-Oosipana dha li dha kutha ombinga muudhano woliha yoSecond Division omukokomoko gwomvula yokatanga kokoompadhi gwaziko natango onkene dha ligamena koshipala sholiha ndjika omolwa oondjambi inaa dhi futwa.

Omudheuli gwosipana yo Young African FC Ndjeimo Tobias ndhika okwa li edhi hololele Kundana sho oosipana odhindji ngashiingeyi dhili mosheentsi oshoka ina dhi mona oondjambi dhadho.

“Kandishi kutya omolwashike omvula ndjika okatanga kokoompadhi kena uulamawuka owundji, otwa li twi igilila pethimbo ndika andola otwa dhana nale omaudhano gontumba moliha ashike pethimbo ndika , noondjambi dhomvula yazako ina dhi futwa,” Ndjeimo Tobias ta ti.

“Oshikondo shokatanga kokoompadhi oshi li monkugo yina Onkambe na oshapumbwa iikondo yilwe yi yemo olunyala pamwe genongo ta ga fe gongombe,” Ndjeimo ta tsikile.

Osipana yOkahandja Military School nayo oya li ya holola enyeto lya faathana noAfrican sho nayo ina ya pewa oondjambi dhawo.

Omupopiliko gwosipana ndjika Costa !Gonteb okwa ti osipana yawo oyi li ya gumwa nayi konkalo ndjoka ta yi inyenge mokatanga kokoompadhi okuza ngaa koshimaliwa shoka ina shi futwa sigo okoliha, ndjoka inaa yi tameka.

Okwa ti aadhani oya li shili ya longo nuudhiginini okuya pondondo mpoka ye li na oya li yena ondjuulukwe okudhana moliha ontiyali moshilongo.

Costa okwa ti ngashiingeyi aadhani oye li ashike kuyoyene na ita ya vulu okuninga omadhewo oshoka kayena kutya ota ya idheulile shike oshoka kapuna esiku lyothaatha moka oliha ta yi katameka.

Ta ti omatango omanene oge li popepi onkene ngele oliha ona yi ka tameka shila omomumvo ta guya oshoka muDesemba oosipana oha dhi yi mokafudhepo.

Oshikumungu shika osha guma wo oongeshefa ndhoka ha dhi landitha iikwamaudhano ngaashi ongeshefa yOtb ndjoka ya ti omalanditho ga yo oga ya pevi noonkondo oshoka oosipana ita dhi landa we iipumbiwa yomaudhano ngaashi oongaku dhetanga , iizalomwa, omatanga , uuhiya nosho tuu.

Ongonga hangano yokulela okatanga moNamibia oyi li ya taalela okwena kwa hula noyendji otaya thaneke kutya elelo lyaNPL li ikuthe miilonga oshoka olya ndopeka oshigwana shoka shihole omaudhano.

LEAVE A REPLY

Please enter your comment!
Please enter your name here