Oshigongi shomapungulo moNamibia

0
108

Oshigongi shomapungulo moNamibia shoka sha hulu oshiwike shika  osha ulike oshinima shimwe shasimana: Kutya oshasimana opo Namibia iitseyithe ye mwene, a  ulike omasindano ngoka a pondola oku ga ulikila uuyuni wopondje, ngoka aapunguli taya kala ya pandula kutya Namibia ehala mushi ku pungulwa kuyo.

Shika osha li sha ulikwa nawa kaapopi oyendji mboka ya popi poonkundathana poshigongi shika , oonkundathana ngaashi ndhoka dha tamekwa ku Wolfgang Teifwnsee Minista yOmahupilo, Uunongononi noshitopolwa shomakwatathano mepangelo lyoshilongo shaFree State  sha Thuringen, nenge sha ulikwa moshi etwapo sha, Tamer Taskin, omunawino mokuninga iiyata a za ko Istanbul mo Turkey  osho wo oshipopiwa sha Ndohotola Carlos Lopes, omuwilikipitithi nale gwoKommissi yOmahupilo yaAfrika yIigwana Hangano.

Ayehe miipopiwa yawo oya tanga omasindano ngoka ga adhika ku Namibia ngoka olundji ha ga dhimbiwa  noku pingenwapo koonkudana ndhoka dhaali nawa.

Omathimbo gamwe ohatu dhimbwa kutya iikundaneki yokuuninginino olundji ohayi tseyitha noku landitha Afrika niilongo ye ongo ashike  oshilongo shimwe oshinenene . Iikundaneki mbika ohayi gandja omahokololo gAfrika ngoka omawinayi ngaashi, guulingilingi, ondjala nenge Ebola. Iipalanyolo iinene mbyoka  ohayi tula mumwe iilongo yenenevi ndika omilongo 52 montungwa yimwe noku eta ethano lyenenevi  ongo oshilongo shimwe oshinene , ethimbo limwe shina oonzo ihaadhi pupo nopethimbo ekwawo enenevi ndyoka lya dhengwa noku ehamekwa  kuulingilingi, ondjala , uufukedhi  oshow o iiponga yilwe yopaushitwe.

Iigongi yopaigwana ngaashi shika shOkupungula moNamibia oyo tayi ulike uukwatya woshili waa shoka Namibia ta vulu okuninga nosho wo oku ndjambula po. Opiigongi ngaambika, tse tatu vulu okuhokolola omahokololo getu gesindano. Shika ngaashi naanaa Omuperesidente Hage Geingob eshi ulike shayela “Nonando otwali twa tsakaneke oompito  oondhigu mwa kwatelwa  okatongo kopalwaala osho wo omwaka omunene pokati kaayamba naathigona, Namibia okwe shi pondola opo a nakule mo aantu konyala etata lyomilliona moluhepo. Shika osha adhika sho elongitho lyoshimaliwa lya  ningwa owina lya gama kombinga yekoko momahupilo osho wo lya gama kaathigona. Moshinima shika omwaalu omunene gwomutengenekothaneko ogwa gandjwa kiikondo yopankalathano ngaashi elongo, uundjolowele osho wo egameno lyopankalathano”

Shika epangelo oli shi shi kutya ompumbwe ndjika itayi hulu mbala momutungilo gwomahupilo goshilongo, ngaashi okukalapo kwomagumbo geli nawa komuntu kehe osho wo eyogopeko, onkene omiitopolwa mbika tatu kumike aapunguli kutya omuna oompito dhokupungula.

Konyala aapunguli omayovi 3000 oya li poshigongi shOmapungulo moNamibia ,oyendji yomuyo mboka ye ende okuza kiilongo konyala yithike pomilongo mbali mwa kwatelwa mboka ya za koEuropa na America. Esindano lyoshigongi shika otali vulu okungongwa  moku koneka kutya  aantu oyendji oya li ya hala okukala po poshigongi ihe inaa mona ompito , oshoka omwaalu gwaa indili ogwa li omunene  gwa pitilila kwaangoka gwa li gwa tegelelwa kaalongekidhi yoshiithanene shika. Uuwindji waantu mbaka owa fala nookuli megweko lyolusheno sho oshigongi opo wala sha tameke.

Ayehe oya li moNamibia okutala  nokumona oompito dhomapungulo ndhoka oshilongo shika shina no ta shi gandja. Oompito dhoku pungula odhindji, dho ishewe otadhi hokitha. Omusholondondo gwiitopolwa moka muna oompito dhomapungulo ogwa gandjwa kOminista Yomathaneko gopashigwana, Tom Alweendo ngoka  a ti ndhika otadhi adhika miikondo ngaashi yuupashioni, uunamapya, omagumbo, iiyenditho nomainyengitho  giipumbiwa. Aanangeshefa  yomoshilongo  oya taalela eshongo oku soshimpwiyu kutya oya longitha oompito ndhoka dha etwa puuyelele  koshigongi shomapungulo.

LEAVE A REPLY

Please enter your comment!
Please enter your name here