Ya kanithile oshindji momulilo

0
232

 

ONYAANYA  – Egumbo lyakuku Selma Kaluwapa mOnyaanya A, moshikandjohogololo Onyaanya olya thigwa pomutenya oshiwike sha zi ko, konima sho ya talelwa po koshiponga shomulilo.

Mwene gwegumbo ndika sho ali a ningwa naye oonkundathana kuyele oshiwike shika, okwa hokolola kutya omulilo ogw faalela omaliko gawo ogendji.

“Omulilo nguka ogwe etwa kuunona mboka twa adhika tu li mo nawo megumbo, ngame onda adhika ngaa ndi ipyakidhila niilonga yandje ku yimwe yomoondunda megumbo, nani handiyaka omulilo ogwa yaka nale, naasho ndaka za mo mondunda moka omulilo oguli nale pombanda tagu tukile koondunda adhihe megumbo,” Kaluwapa ta ti.

Otaku hokololwa aanona mboka yali megumbo na yinakulu yali taya dhana okapalwa, naashino oshe eta opo ya fikepo yimwe yomoondunda dhoku pungula, go omulilo tagu ende tagu nuka sigo gwa fikepo oondunda adhihe megumbo moka.

Kuku Kaluwapa okwa ti megumbo moka omwa pila omaliko gawo ogendji molwaashoka oondunda adhihe odha pyamo thilu mwa kwatelwa naandhoka dhokupungula, iigandhi naadhihe woo. Okwa ti omwa pila uuthemba wawo awuhe no ina pu hupa nande osha.

Ta ti oyeli monkugo yina onkambe molwaashoka oondunda dhawo dhoompungulwa odha lakatapo thilu no inaya thigilwapo shoka ta yali naanegumbo lye. “Sho nda ka za mondunda ndi tale omulilo ogwa kwata nale oondunda odhindji megumbo, no inatu vula we oku gu dhima, oshinima shika oshetu dhenga unene pomitima negumbo lyandje oshoka otwa thigwa pongalangala,” Mwene gwegumbo ndyoka ta hokolola ngaaka.

Nonande megumbo muka mwa pya oondunda adhihe kuku Kaluwapa ota pandula Kalunga molwaasho ina mu pila omuntu mo inamu monena nando ogumwe oshiponga , unene ngaa uunona mboka wa eta omulilo, ta ti sho wa mono omulilo gwa yaka owa fadhuka po eta wu yi kokule.

Otaya pula moshigwana opo shi ya yambidhidhe naashoka ye napo yo ya vule ya thikamithepo egumbo lyawo ngaashi lyali nale. Tati oyali ya tseyithile ombelewa yaKansela goshikandjohogololo, noya pewako uushako wuusila uyali , nando a pandula kuushako mboka ota ti ita wu gwanene egumbo lyawo alihe.

Kansela gwoshikandjohogololo Onyaanya Petrus Kambala okwali a talelepo egumbo ndika noku tala nkene omulilo gwa hanagula. Kambala ta ti pombelwa yawo kapena iikulya ya gwana, oya gandja po ngaa manga uushako mboka uyali yo ya tale kutya otaya kwatha ngiini egumbo ndika, noku vula ya mone omauthemba gawo ngoka ga pyapo.

destroyed2 destroyed1

 

LEAVE A REPLY

Please enter your comment!
Please enter your name here