A zimine kutya oye a dhipaga omukadhi

0
259

 

OSHAKATI-Ondin’ ondjo! Ondin’ ondjo! Ondin’ondjo koshipala shepangelo, koshipala sha Kalunga, koshipala shompangu, koshipala shaamwandje nosho wo koshipala shomazimo gopaali.

Ndhika odhali dha zi mokana komulumentu ngoka ngashingeyi ta tamanekelwa edhipago  sho ali adhipaga omukiintu gwe omvula ya ziko pOnalulago moshikandjohogololo Oniipa moshitopolwa Oshikoto.

Oshiningwanima shika oshali sha ningilwa popepi negumbo lyawo momasiku 17 Juni 2015 sho Johannes Shipanga a yaha omuholike gwe Justina Shipanga nondjembo ooholo mbali momutse.

Metitatu nguka okwali a yi miihokolola kutya osha ende ngiini opo a dhipage omukulukadhi gwe na okwa li a hokolola kutya ye okwali a mono omuholike gwe a tuminwa okatumwalaka okafupi kongodhi  komulumentu gwedhina Joseph Iyambo.

Shipanga okwa ti okatumwalaka haka okali ke mu halutha nokuluudhika omutima gwe.

Ihe shoka sha ka tula oshilalo omongwa oshoka kutya anuwa omulongi posikola Onguma gwedhina Helena Uusiku okwali wo a lombwele Shipanga kutya omukulukadhi gwe oha kala na Joseph Iyambo.

“Onda ningi onkambadhala etandi pula omuholike gwange ihe okwedhi ikala ta ti kutya ye kena iihole na Iyambo. Sho wo nda ka pula Iyambo naye woo okwedhi ikala kutya yo ookuume ashike haya ende pamwe okuya koositola noshowo okuya kiigongi yaalongi,” Shipanga ati ngaaka ta lombwele ohofa.

Shipanga okwa ti wo kutya ye nomuholike gwe nonande oyali yeli mondjokana yina ombili sigo omomvo omayovi 2009 sho a kanitha iilonga, osha ka kala kaashina ombili.

Shipanga okwa ti okwa ninga oonkambadhala odhindji oku eta ombili mondjokana yawo ihe  adhihe inadhi pondola sha.

Sho a pulwa komutamaneki nomukalelipo gwepangelo kutya omukiintu gwe okwa li emu dhipaga ngiini okwa ti okwali emu dhengele ongodhi komatango opo emu kwathe eye kuye awape okumufala pehala limwe mpoka ali a pumbwa oku fala ko okamutse ke.

“Sho omukiintu gwandje a thiki onde mu pula kutya ota galukile kegumbo uunake okwa ti kutya kandina uuthemba woku mu pula epulo ndika na itandi ka kala ndina uuthemba mbuka.

“Oh!Omutima gwandje ogwa luudha, ombepo yomutondadhi ya adha ndje , nda longo iilonga yuudhudhu, yuulingilingi nosho wo yeuvitho nayi,” Shipanga a hokolola ngaaka.

Okwa ti kutya omukiintu gwe okwe mu yaha ooholo mbala momutse yotango okwa gwile komatundji ge omanga ontiyali a wewetele pohi yoshipundi shoka shali sha kuutumba Shipanga.

Shipanga okwa hokola kutya okuza mpoka okwa hingi oshihauto shoka sigo opeelo lyegumbo  lyaandjawo  mpoka a tomeke ohauto ye omundilo nomudhimba gwa nakusa gulimo nelalakano lyoku kanitha uumbangi. Shika okwa ti okwe shiningi sho ombepo ya Satan ye mwa adha.

Ihe sho a pulwa kutya ohombo yawo oya kala yili momahepeko okwa ti aawe ndhoka ka dhi shi dhoshili.

LEAVE A REPLY

Please enter your comment!
Please enter your name here