Aya konima yekumba eshi a kengelela ovafuko

0
999

 

Ongwediva

Ovafuko veli 14 kumwe ova patululila omukainhu omunyasha oibofa iheyali youlunga noukengeleledi eshi eva kotokela oimaliwa yavo nokuningila eehango davo oushada.

Omukainhu eli mepupi leedula dopokati wedina Martha Itana okwa holoka nale momhangulilo yaMangestalata waNdangwa omo a anyenwa eli futile mo modolongo. Okwa teelelwa yo aka holoke momhangulilo koitukulwa imwe moshilongo, oko a patululilwa oibofa molwaashi a lila ovafuko oimaliwa yomayovi mahapu.

No nande otaku fekelwa Martha Itana a kengelela ovanhu vahapu, mongaha okwa patululilwa ashike oibofa iheyali, ashike ota ku tengenekwa kutya otashi dulika taka patululilwa oibofa ihapu.

Otaku hokololwa omukainhu ou a nyeka ovafuko nokudedelifa eehango davo okupitila mongeshefa yaye yedina Kulah Investment cc. Itana vati okwa kala ta udanekele ovafuko kutya oku na ongeshefa yoku yandja eetenda nokuwapeka oingobele yovafuko. Vati efimbo nefimbo okwa kala ta lombwele ovanhu kutya oha landifa oikutu oyo ha kufa koSouth Africa nokoChina. Itana okwa kala ha ngeshefa ehangano laye kofacebook oko ovafuko va kwatafana naye. Eshi osha eta ovo va tokola okuhombola va pule ekwafo longeshefa yaye opo ngeno a wapeke eehango.

Ashike ovanhu vati ohave li hange ashike veli mohango, ashike otenda noipundi kaipo –nande ovafuko va futa nale oimaliwa omayovi.

Ouyelele oo wa yandjwa komupedu komanda wopolifi yaShana Deputy Commissioner Karl Theron otau ti Itana okwa patulululilwa oibofa itano. Nokwa holoka nale momhangu omolwa oibofa ivali yomwaayo.

Theron ta ti moibofa yomOndangwa vati okwa kengelela ovafuko vamwe oshimaliwa shi dulife po N$ 55 778, omanga koshitukulwa shaMusati a kengelela ko ovafuko oshimaliwa shi dulife po N$64 600. MOngwediva okwa patululilwa mo oibofa ivali, vati a kengelela ovafuko oshimaliwa shi dulife poN $ 28 000.

Otaku hokololwa Itana a patululilwa oibofa ivali koshitukulwa shokErongo oko vati a kengelela ovafuko vamwe oshimaliwa shi fike hanga po N$ 18 000, navakwao oshi fike hanga po N$ 12 000. Omwaalu woimaliwa yaava va patululila Itana oibofa oudule po N$ 180 000.

Theron ta ti Itana okwa teelelwa opo aka holoke momhangu kOmusati nokErongo nokOshakati.

LEAVE A REPLY

Please enter your comment!
Please enter your name here