Ependa Kristofina Nanghalu la findikilwa kengafifi

0
254

 

EENHANA – Ongudu yovalilafya, ovakwadimo keembinga adishe oya li pepako lomunamido 60 Kristofina Nghinahonde Nanghalu  oshivike shaya momaendo eongalo laEenhana moshikandjohoololo shaEenhana moshitukulwa shaHangwena.

Nanghalu a dalelwa kOmungholyo moshitukulwa shaShandi moshikandjohoololo shaNdobe  omido omilongo hamano da ka pita  pamwe novakulunhu vaye ova tembukila kEpasha moshitukulwa shaHangwena, nokwa fikola mOmundaungilo fiyo efimbo omukunda Omundaungilo wa ninga eputu.

Pefimbo loita yekondjelomanguluko ya ka duva okwa li a hombolwa  pomukunda Okakango moshikandjohoololo shaPembe moshitukulwa shaHangwena. Monghalamwenyo yaye okwa shakeneka omashongo manene unene manga oshilongo inashi manguluka.

Nanghalu okwa kala omuyakuli wovakwaita ovakondjelimanguluko noku he na edimbuko navamwe ova twikila noukaume konima eshi oshilongo sha manguluka. Okwe va telekela, okwe va pukulula kombinga yomakwafo oludi keshe vali tava pumbwa ngaashi okuva pa eefewa,omaadi nokufufila eemhadi davo di ha monike komukolonyeki.  Okwa kala e hole ongudu yoSWAPO nokwa kwafela vahapu vehe shii okulesha ngee taku ningwa omahoololo moshikandjohoololo shavo. Oshilonga sheyakulo okwe shi longa fiyo Namibia a manguluka 1990 nosha li shipu kuye a kale omuwiliki mevava loomeme voSWAPO moDistrika yaHakafiya moshikandjohoololo shaPembe moshitukulwa shaHangwena. Nanghalu okwa kala yoo omuwiliki wosinagoga shaHakafiya fiyo efimbo eshi a kwatwa kounghundi 2013.

Etameko lounghundi waye ola etifa a efe po oinakuwanifwa yongudu yoSWAPO. Ounghundi owa twikila komesho fiyo osheshi a fuda mo omufudo waxuuninwa pehovelo lohani ei moshipangelo shaKatutura moWindhoek.

Okwa pakelwe Olomakya la djako okudilila meongalo nomomaendo aEenhana opo pa li ongudu inene ya dja keembinga neembinga doshilongo. Okwa fiya ko ovana vatano oukadona vane nomumati umwe novatekulu vatano.

LEAVE A REPLY

Please enter your comment!
Please enter your name here