Meya gwaShakati anuwa ota kondjele uuthiga

0
414

ONGWEDIVA-Mayola gwelelo lyandoolopa yaShakati moshitopolwa sha Shana Katrina Shimbulu okwa galukila ishewe miikundaneki sho a niwa ta kondjele egumbo lyahekulu omanga omukadha-hekulu hoyana yeli pomutenya.

Shimbulu sho a dhengelwa kuKundana okwati kutya ye egumbo olili miikaha ye shaashi oye a li ta sile hekulu oshimpwiyu omanga ali eli muuwehame.

Otaku hokololwa nakusa Absalom Angula ngoka a zile komukunda Okaukamasheshe ali ena egumbo mondoolopa yaShakati. Egumbo ndjoka olyo nee anuwa ngashingeyi tali kondjelwa kuShimbulu naavalwa ya nakusa Angula. Sho asi mo2004, Angula anuwa okwa thigi oyanamati ya tatu nomukadhi. Komima omwana gumwe okwa kulitha, ngashi ngeyi opena oyeli yaali, mboka gumwe gomuyo anumwa ena uulema.

Festus Angula, omwanamati gwanakusa Absalom Angula okwati okweende poombelewa odhindji a kwathelwe shinasha negumbo lyahe, ihe ina pondola sha oshoka Shimbuli oha lombwele aanambelewa kutya shoka oshinima she zimo yo kayena mo sha.

Ashike shoka tashi ehameke Festus ooshoka aniwa kutya he okwasa ena egumbo ihe ngashingeyi okuli moshana kena mpoka tazi.

“Omuntu nguka okwaya koombelewa oonene, unene kombelewa yoHome Affairs eteya lombwele kutya tate kena aanona nomukulukadhi,” ati ngaaka.

Okwati kutya nonande okwa patulula oshipotha kopolisi opo Shimbulu eya pe onzapo ya he yeso, Shimbulu moomitumba dhoka aniwa oha zi mo ashike omanga omitumba inadhi pwa tati kutya otaka longa iilonga ye.

Shimbulu dhika okwe dhi i kanyuna tati momitumba moka oha zi mo omitumba dha pwa na okwati omona gwanakusa ina kala nale omutumba naye pafamilia ihe okwe mufala ashike koombelewa.

Mayola okwa tsikile ko kutya oombapila okudhina oshoka oye kwali edhi pewa koshipangelo konima sho hekulu asi.

Ashike aniwa nomona mati gumwe gwanakusa Absalom ngoka oshilema na okuna uuthemba wo kupewa iimaliwa kepangelo mbyoka yaanuulema, okwali ashangitha nombapila ya za kundohotola oshoka aniwa uuthemba wahe owa tindilwa kuShimbulu.

Festus okwati kutya shika otashi yemateke unene sho tashi ningwa komuntu omulongwantu ngoka u uvite ko uuthemba womuntu .

Okwati keshiwe kutya na ninge ngiini oshoka oombelewa dho monooli kehe ashike dhuuvu kutya oShimbulu ta popiwa ihaya yi we komesho nehokololo oshoka Shimbulu ohe ya lombwele ya ikaleke kokule niinima ye zimo lyawo.

LEAVE A REPLY

Please enter your comment!
Please enter your name here