Nambala a kwashilipaleka ongulu yomadhewo mEluwa

0
156

ONGWEDIVA-Johannes Nambala okwa ningi kayuhwena hadhela nyoko ehulilo shiwike lyayi konima sho ali a egulula ongulu yomadhewo ndjoka yina ilongitho yopashinanena lela.

Omutondoki nguka, ngoka eli gumwe gwomaanasikola aakulu posikola ndjika okwa li a tameke opolojeka ndjika omvula yaziko konima sho a li a sindana uu ambasanda woWindhoek Larger.

Okwa ti oku na natango oshiputudhilonongelo she sho petameko komutima oshoka osho she mu eta pomuthika mpoka eli.

Nambala ngoka a li eende pamwe nosheendo sho lutu halulele uudhano waanuulema moNamibia opamwe nomumatuki omukwawo Ananias Shikongo okwa egulula ongulu ndjoka pethimbo lyetalelo po lyosheendo she kuumbangalantu woshilongo.

Aatondoki mbaka yena uulema oya li metalelo po kolundume lwoshilongo oku ka ulukila oshigwana shokiitopolwa mbyoka oombandi dhawo ndhoka ya sindana muudhano wOparalympika mo Rio de Janeiro muSeptemba nuumvo.

Ongulu ndjika oyina omashina gokudheula olutu gongushu yo N$ 10 000 na ota ga ka longithwa kaanasikola yomEluwa opo ya tunge omalutu gawo pamadhewo.

Nambala oku uvite kutya Eluwa olina iitalenti oyindji nongele olya pewa iilongitho yopashinanena nena otwa tegelela iiyimati iiwanawa monakuyiwa.

Omukuluntusikola gwoshiputudhilo shika shaanona taya lumbu nuulema Ndinelago Nangolo okwa ti oshiputudhilo shika osha totelwepo mo 1966 sha tamekela kEngela moka sha li ta shi lelwa kaaSoomi.

Na osha li sha lundululilwa kOngwediva sho Epangelo lya South West Africa lya li lya kuthako oshinakugwanithwa shelongo sigo onena osikola ndjika otayi humu nawa komeho yina aalongwa yethike po 349 okuza pondondo yotango sigo ontimulongo.

Omukuluntusikola okwa ti egandjo lyiikwathithi mbika yokudheula omalutu otali ka kwathela aadhani opo ya kale yena omalutu ga ndjanga nogeshi okwiinyenga na ota shi ka kwathela mehumo komeho lyomaudhano.

Omudhani gwumwe ngoka a li a kalelepo Namibia koParalympic Lahja Ishitile oku li omunasikola penongelo ndika na oku li gumwe gwomwaamboka taya ka tyapula uuwanawa wiilongitho yomongulu ndjika

LEAVE A REPLY

Please enter your comment!
Please enter your name here