Oalbuma yaFilly-zo yotango osho ya piti

0
243

 

ONDANGWA – Konima yoomwedhi hamano sho omuhikingalo Fillemon Angombe ngoka a tseyika nawa Filly-zo Namwater, ali a thigipo ongundu yo Young Kasi okwa kala ta longo neitulemo, no ta ka kala a pititha oalbuma ye yotango ehuliloshiwike ndika.

Filly-zo ota ka pititha oalbuma ye yotango tayi ithanwa Em”cherri kolukanda. “Onda kala tandi longo neitulemo nonda thaneka opo oalbuma ndjika yi pite etitano ndika twa taalela, omolwa elongelokumwe ndyoka ndina naahikingalo ooyakwetu inashi pula ndje ethimbo ele,” Filly-zo ati.

Moalbuma moka otamu adhika oongalo dhili 14, okwa kwathelwa kaahikingalo ngaashi Kalux, Symone, Young Kasi, Sedjo Mind, D-Square, Lisias na yalwe oyendji. Ta ti otamu adhika oongalo ngaashi Onghalamwenyo, Haitoloka, No sugar added na dhilwe.

Filly-zo okwa ti ota kala ta longo nomukumo opo natango a pitithe oalbuma ontiyali omumvo twa taalela. “ohandi kala nda nyanyukwa okutala ehangano lyaahikingalo moshilongo tali koko, ondina ondjodhi onene mokuyambulapo ehangano ndika, elongelokumwe mokati kaahikingalo olya pumbiwa oshoka otali tu mangele kumwe,” ta gwedhapo.

Ta ti ka puna oshilonga hashi longwa nuupu, naye opo oalbuma ye eyi etepo okwa pitila miilonga tayi pula omazigudhe. Ta ti ethimbo limwe oho kala wa pumbwa oshimaliwa opo wu pitithe oalbuma yoye ashike kuna mpoka to shi adha.

Filly-zo okwa yelitha kutya otaya lalakanene okugandja etumwalaka moshigwana pamukalo goongalo noondjimbo, ati aantu oyendji ohaya pulakene oongalo netumwalaka otali thiki mbala, noku taandela.

“Otandi kumagidha aahikingalo ooyakwetu opo ya kale taya hiki oongalo ndhoka dhina etumwalaka tali tungu, no tadhi vulu okupulakenwa, olundji nopendji oto adha omuhikingalo gontumba a pititha ongalo ashike ka yina nande etumwalaka lyasha tali tungu, tu longeleni kumwe tse tatu kala tatu paathana omayele tu vule okuhuma komeho,” ta tsikileko ngaaka.

Oalbuma otayi adhika ngaashi poAntonio Art mOvenduka, mOndangwa, nenge kehe ngoka wa pumbwa oalbuma ndjoka okutameka etitano ndika twa taalela monathana na Filly-zo yemwene.

LEAVE A REPLY

Please enter your comment!
Please enter your name here