OKANKERA ILE OCANCER YEVELE OSHIKE?

0
344

Ocancer yevele ocancer hai tukuka meecells devele. Ohai tameke moumufipa ovo hava endele omashini ile moungumutulu omo hamu longwa omashini. Ocancer oyo hai tameke moungumutulu ovo hava longo omashini ohai ifanwa Lobular carcinoma, omanga oyo hai tameke moumufipa omo ha mu endele omashini ohai ifanwa Ductal carcinoma.

Ocancer oyo hai tameke moumufipa omo hamu tondoka omashini oyo ihapu idulife oyo hayi tameke moungumutulu omu hamu longwa omashini.

Ocancer yevele luhapu ohai hange ovakaiunhu shidulife ovalumenhu, ashike ita shiti ovalumenhu itava kwatwa yoo kocancer eyi.

Ocancer yevele oyo ocancer ei hai hange ovakaiunhu luhapu, okuyelekanifa neecancer dikwao mounyuni aushe, ya hanga nokuli eepelesenda 22.9, meecancer adishe odo hadi kwata ovakainhu. Eepelesenda 18.2 domafyo aetwa kocancer mounyuni aushe oda etwa kocancer yevele (oku kwatela mo ovalumenhu nosho yoo ovakainhu).

Ocancer yevele oihapu unene moilongo oyo ina eputuko laya komesho (ngaashi America), oku yelekanifa noilongo ei opo tai putuka (ngaashi Namibia). Eshi oshili ngaha omolwa omatomheno aa:

  • Ovanhu vomoilongo yaputuka ohava iha va fi diva, yoo ocancer yevele luhapu ohai uya meedula dokuya moukulupe luhapu.
  • Oikulya yomoilongo yaputuka oya yooloka yoo kwaayi yomoilongo eyi opo tai mono eputuko, ovanongononi tava ti.

 

OUKWATYA WEVELE (ANATOMY)

Evele lomukainhu ola tungwa po koinghene, oumwiya ovo va kwata evele opo likale lina olupe levele (connective tissue), oungumutulu vahapu omo ha mu longwa omashini, nosho yoo oumufipa vahapu omo ha mu tondoka omashini okufika kondungu yevele. Tala kefano la landula ko tali ulike evele lomukainhu

Ngaashi naana oilyo ikwao yolutu, evele nalo ola tungwa po koutukulwa vashona (keecells dihapu), nongeenge eecells edi da fi, ohadi pingenwa po kudimwe dipe, pamulandu wa tulwa po oku dya keshito.

Mokaankera yevele, eecells edi ohadi hapupala shiheli palandulafano, nohadi twikile okudalafana sha pitilila fiyo tadi ningi nee oshitumbuka osho tashi dulu oku pitilila nomevele ndee tashi kwata koilyo imwe yolutu.

 

  1. Eeenhumba dopokati keemhati (muscles) 2. eenhumba dokoshi yevele(muscles) 3. Oungumutulu ovo hava longo omashini (lobules) 4. Ondungu yevele (nipple) 5. Omudingonoko wondungu yevele (areola) 6. Oumufipa omo hamu tondoka omashini 7. Oinghene yevele (fats) 8. Oshipa shokoshi yevele

 

OMADIDILIKO OKCANCER YEVELE OKULI NGAHELIPI?

Edidiliko lotete locancer yevele luhapu ohali kala okatumbuka itaka ehama nandenande. Outumbuka nee vahapu hava tumbu mevele haaveshe vocancer. Okatumbuka taka tumbu mevele lomunyasha luhapu kakeshi ocancer, omanga oko taka tumbuka mevele lomukulunhu, opena omhito inene ka kale kocancer. Ashike eshi itashi ti ocancer yevele itai dulu ku kwata omunyasha.

Oshina nee oshilonga opo keshe ngoo omukainhu teli hange ena okatumbuka mevele, aye pundohotola waye opo ka talwe diva, koo ka konaakonwe ku talike ngee ocancer ile hayo.

Ngee omukainhu e li hange ena omadidiliko aa taa landula apa, na ye pundohotola waye diva opo a konaakonwe:

  • Oshitumbuka shili mevele (ta shi ehama, ile itaa shi ehama)
  • Ouyehame uli mevele ile monghwapa, ashike inau kwatafana nomafimbo omukainhu
  • Okutilyana kwoshipa shevele, ile oumbululu vafa velemune veli kevele
  • Oipulu ili kondungu(nipple) ile ya dingilila ondungu yevele
  • Oshitumba shili mongwapa
  • Oshitopolwa shimwe shevele sha tumba shi dulife ikwao
  • Kondungu yevele ota ku di, otwila ile ohonde
  • Ondungu yevele tayi lunduluka, tai ningine mevele
  • Evele limwe la kula lidule likwao, ile la lunduluka ku likwao
  • Ondungu yevele, ile ombinga imwe yevele tai yuunuka

Tala yoo koufano va landula ko tava ulike omadidiliko ocancer yevele:

OCANCER YEVELE OHA YI ETWA KOSHIKE?

Ovanonghononi inava yelelwa naana kutya oshike hashi eta ocancer yevele. Oshidjuu oku yoolola kutya omolwa shike omunhu umwe ta kwatwa kocancer yevele, yee umwe itaa kwatwa. Ashike opena oinima oyo ya kwatakanifwa neholoke po lacancer yevele. Imwe yomu yo ongaaashi:

  1. Eedula domoukulunhu
  2. Omukainhu shi dulife omulumenhu
  3. Eshito (genetics)
    1. Oomeme ava vena ovakwanedimo vopopepi lela va kwatelwe kocancer yevele, ovena omhito yokukwatwa kocancer yevele.
    2. Opena ocancer yevele oyo hai dulu ku tandavela nofamily.
  4. Omunhu a monikile nale ocancer yevele, okuna natango omhito yokumonika ocancer mevele olo tuu olo, ile mevele likwao
  5. Omunhu a tandelwa nale outumbuka kevele okuna omhito(risk) ili pombada kanhiingholi yoku kwatwa kocancer yevele
  6. Omunhu a whikwa noRadiation molwa omikifi dimwe, ile a kala mekwatafano noradiation
    1. Radiation ohai dulu okweeta eecancer dihapu, mwa kwatelwa yevele
  7. Omunhu inaa mona oludalo, yee ina nyamifa
    1. Ovanongononi ova didilika kutya ovakainhu ava inaava mona oludalo ohava kwatwa kocancer yevele oku yelekanifa naava va mona oludalo
  8. Okunwa omakaya okwa kwatakanifwa neecancer dihapu, mwa kwatelwa yoo yevele
  9. Oshiviha shihapu nasho osha kwatakanifwa neecancer domaludi mahapu, mwa kwatelwa noyevele
  10. Okwa didilikiwa kutya ovakainhu ovo hava nhu eepela doHormone Replacement Therapy oha va kwatwa kocancer yevele vedulife ovo ihaa va nhu eepela edi.

OCANCER YEVELE OHAI KOLEKWA NGAHELIPI (DIAGNOSIS)

Luhapu ocancer yevele ohai monika ngee omunhu aya ashike komakonaakono opaunamiti yee ehena oupyakadi, ile ngee aya ko ena oshitumbuka shomevele.

Ngee wa mono omadidiliko ngaashi aa a tumbulwa pombada, owa pumbwa oku ya ku ndohotola woye. Ndohotola oteke ku pula omapula ena sha noupyakadi wevele, ta pamhadala omavele aeshe, nosho yoo meenghwapa. Otashi dulika yoo eku tume uka fanekwe noultrasound ile no mammogram. Opena yoo omafano amwe vali manene ngaashi MRI scan oo taa dulu oku fatululwa nawa kundohotola woye.

Ngee Owa monika una oshitumba, otashi dulika ndohotola woye a longekide oku kufa okatukulwa koshitumba osho, ile eshi kufe mo ashishe shoo shi ka konaakonwe ku talike ngee ocancer yevele.

OCANCER YEVELE OHAI HAKULWA NGAHELIPI?

Epango locancer yevele ohali ningwa keendohotola doikondo yayooloka, ya kwatela mo ovatandi (surgeons), eendohotola dokuyandja omiti docancer (oncologists), eendohotola domolabola (pathologist), nosho yoo ovalongi vopaunamiti voikondo yikwao ngaashi ovapangi, eepsychologists, physiotherapists nosho tuu.

Epango ohali li kwatelele kutya ocancer oya hangika yatandavela shifike peni, ile oili ashike mevele ndele inai tandavela. Hano, ngee oya monikila po kuyele otai dulu okutandwa mo (tashidulika nokuli evele li tetwe ko). Ngee oya hangika ya tandavela yaya koilyo yolutu ikwao, nena ovayandji vomiti docancer ovo unene tava ungaunga nepango pomhito oyo (chemotherapy and radiation).

OTUNA KU NINGA NGAHELIPI OPO KOCANCER YEVELE I MONIKE DIVA YOO YI HAKULWE?

  1. Omukainhu keshe na kale heli pamhadala yeemwene, opo ngee a mono oshitumba mevele laye eshi lopote kundohotola.
  2. Omukainhu ou ena ovakanedimo vopopepi, ile ovakulunhu va kwatwa kocancer yevele oshiwa a mone ndohotola, voo ta tule po omulandu wokukonaakonwa omafimbo nomafimbo
  3. Ngee wa mono omadidiliko a tumbulwa pombada, mona ndohotola woye opo eku konaakone.
  4. Oshiwana ota shi kunhililwa opo tuha teelele ashike ngee omunhu toyehama opo to yi kundohotola woye, ashike shi kale tashi konaakonwa, nande omunhu ito ehama. Ndhohotola ota dulu oku ku pa ouyelele kutya lungapi sha pumbiwa oku kala to konaakonwa.

 

LEAVE A REPLY

Please enter your comment!
Please enter your name here