Okufadukapo kwaShaduka naku kale oshilongwa

0
243

Efadukepo lomulumenhu oo a pelwe eedula 20 modolongo molwedipao lomukadi eedula nee dakapita, ola pumbwa oku ninga oshilongwa shiwa komhangu yaNamibia, koveta yoshilongo, noketanga lopolifi mokukonga ovalongi voimbuluma.

Lazarus Shaduka, nakudipaa omukulukadi waye Selma Shaimemanya mo2008, okwali a tokolelwa ehandu lipe momafiku 12 Desemba 2012 nokupewa eedula 20 modolongo molwa oshimbuluma osho a ningile.

Ashike eshi omupanguli a yandja etokolo, diva diva Shaduka okwa tauluka eengaba nokuya moAngola, no ina monika vali.

Ngeenge owa landula ondjokonona oshimbuluma shaShaduka, ota shi ulike kutya, momafiku 13 Juli 2008 omo Shaduka a dipaa Shaimemanya omunamido 33, oo ali hamushanga woMinista yEameno. Efimbo olo ovali vena okaana keemwedi omugoi.

Momafiku 14 Juli 2008, okwali a kwatwa po nokuholoka momhangulilo yopombada. Shaduka okwa li a monika ondjo medipao liheshi loshiningilawina, nokupewa ehandukilo lodula imwe ile a fute oshimaliwa shifike poN$ 25 000. Epangelo kala li la panda etokolo olo la yandjwa komhangulilo yopombada, na olatokola opo li twikile nokuya komhangulilo oyo ya shiya ko moshilongo, oko momafiku 12 Desemba, Shaduka ali a monika ondjo yedipayo komhangulilo ya shiyako. Momafiku omo tuu omo, 12 Desemba, konima ashike yeevili nhatu eshi a monika ondjo, Shaduka okwa tauluka eengaba nokuya moAngola, omo vati a kala fiyo oshivike eshi, eshi eli yandja kombelewa yomukalelipo-shilongo waNamibia moAngola.

Monghendabala yokumona nokueta Shaduka kodolongo, opolifi oya udaneka okufuta N$ 20 000 kwaau ou ta yandje ouyelele tau twala fiyo omekwato po laShaduka. Eshi kwa monika kutya kapena ou ta yandje ouyelele oshimaliwa osho osha ndjekwa po fiyo opoN$100 000.

Ovakalelipo vopaveta vepangelo nonande va longa oilonga yavo, okufya oshisho kutya ouyuuki owa tulwa moilonga, onghalo yoveta (legal system) yaNamibia kai li naanaa nawa. Noshinima eshi sha ningwa kuShaduka osha tula poluhaela nokunyaneka eembululu odo dili momulanda womhango yoshilongo.

Kokutya, Shaduka na kale omunhu wa xuuninwa ta pewa ehadukilo pefimbo ye ehe mo mhangulilo.

Osha yela kutya omunhu ngeenge ota longo oikulumuna ngaashi oyo ya longwa kuShaduka, oku dipaa omuholike waye noku kendambala opo a kanife oumbangi paku popya oipupulu, ota shi ulike kutya muye kamu na naanaa oumbada nefimaneko loveta, unene tuu eshi taku popiwa kutya Shaduka okwa kala nokuhepeka omuholike waye omanga ali ena omwenyo.

Nonande omukainhu ou a kala noku mu patululila oibofa, ina tula po omahepeko. Ondjokonona yaShaduka okukala pomunghulo noveta otai ulike kutya haye omunhu woku monika ondjo pefimbo eheli momhangu, shaashi oveta otai dulu okuteelela keshe shimwe osho ta dulu okuninga. Ngaashi naanaa a faduka po ngaho nokuka ninga eedula adishe nhee moAngola.

Vali, omolwa eembululu dili momulandu womhango yoshilongo, epangelo ola kanifa oimaliwa omayovi mahapu okukonga Shaduka. Kutya nee omeengodi, omokufaneka omafano noku a andjakaneka ile okufuta ovapolifi eeSnT ovo va kala tava kongo Shaduka kuhena edimbuko.

Naasho ngeenge nee inashiwana, epangelo eshi eliyandja, natango oimaliwa vali tai hepekwa okutula Shaduka medadaka okumu kufa kOshikango nokumutwala koWindhoek.

Ehepeko eli olali tali dulu okukelelwa ngeenge ngeno omulandu womhango yetu kawa li wa efa omhangu iyandje etokolo omanga omupangulwa ehe mo momhangulilo.

LEAVE A REPLY

Please enter your comment!
Please enter your name here