Oongundu dhomalwiimbo dhaNyanyukwa otadhi pula komeho

0
215

 

ONDANGWA –  Ehangano lyoondjimbo dhopambepo ndyoka lya tseyika nedhina Nyanyukwa Musical Works otali pula komeho noondjimbo. Pethimbo ndika ehangano olina oongundu dhoondjimbo dhili ne.

Nyanyukwa okuli mewiliko lya Nestor Mamba Shaanika osho wo meme Aina Kasheeta ( Uukwambi tuu keme ). Oongundu dhomalwiimbo ndhoka dhili mehangano ndika odho Nyanyukweni yokoVenduka, Mweneni yomOshakati, Tilila omhepo yoye yokoRehoboth osho wo Metumo yokegongalo Ekamba.

Oongundu ndhika odha tota omaimbilo ogendji no yi ipyakidhila okupititha oondjimbo odhindji. Shaanika okwa ti oondjimbo dhawo ohadhi enditha oomwenyo odhindji, shono tashi etitha omuntu ngoka a pulakena a lundulule noku ninga omukriste a papudhuka.

Oongundu dhomalwiimbo odhali dha gongala pehulilo lyomwedhi gwa ziko, opo dhi ikunde dho dhi imbe oondjimbo noku nyanyukilwa pamwe. “Oondjimbo dhopambepo odha simana oshoka ohadhi gandja etumwalaka lya yela, nolyu ukilila, ohadhi kwatha mboka ya pongola nenge yena oomwenyo dha gwa pevi,otatu tsikile noku imba oondjimbo tse tu uvithe pamukalo goondjimbo,” Shaanika ta ti.

Nyanyukwa okuna iilyo yaza komagongalo ga yooloka moshilongo na Shaanika okwa gwedhapo kutya oondjimbo dhopambepo aluhe otadhi kwatha okuza kuuwinayi okuya kuuwanawa. Otadhi itedhululitha omuntu, onkene omwiimbi kehe oye omuuvithi oshoka ota gandja etumwalaka tashi pitile moondjimbo,nomoondjimbo omuntu ota popi naKalunga,ta galikana, ta indile,ta pandula,ta hambelele no ta kugile Omuwa ekwatho.

“Oondjimbo ohadhi holola puuyelele omaiuvo gomuntu,ohadhi nkondopaleke wo omadhiladhilo no tadhi tungu ekwatathano ewanawa,uukumwe,uukwawo wanankali,oondjimbo odho wo oshilongitho okulonga aantu oohapu dha Kalunga,yo omusika muuyuni oyo oshilonga oshinene oku gandja etumwalaka kaantu,” Ta gwedhapo ngaaka.

Shaanika ta tsikileko ta ti oondjimbo dhopambepo odhina uuwanawa owundji notadhi kwatha opo aantu ya  simaneke Kalunga momakana nomomitima,otayi kwatha muukwambepo noku hwameka eitaalo, otayi longo aaimbi noshowo yalwe oohapu dhaKalunga,otayi ku itaalitha mu Kalunga, a ti oondjimbo otadhi  shitulula woo omadhiladhilo no tadhi gamene omadhiladhilo gaantu kiinima iiwinayi.

Okwa pandula aayimbi yoongundu dhehangano lyaNyanyukwa sho haya longele kumwe, teya kumike ya uvithe pamukalo goondjimbo, yo ya kale aluhe aatili Kalunga moonkalamwenyo dhawo.

 

LEAVE A REPLY

Please enter your comment!
Please enter your name here