Shikongo a kumagidha aanyasha ye ethepo iikolitha

0
194

 

TSANDI-Omumatuki gwaNamibia ngoka a li eeta ombandi yoshingoli okuza kuudhano waanulema koRio okwa kumagidha aanyasha opo yaa manene ethimbo lyawo miinima itaa yi tungu oonkalamwenyo dhawo ngaashi omalovu niingangamithi.

Ndhika Ananias Shikongo okwedhi popile poshiindingili showina shoka sha li sha longekidhwa kombala yUukwaluudhi Olyomakya gaziko, shoka sha li sha kalwa kaagundjuka yaza moosikola dhopomudhingoloko gwombala.

Enyakwa mokumatuka olya li lya ulike ekenyanano lyalyo kombinga yiikolitha molwashoka mbika otayi teyapo omalutu gaantu na ohayi hanagulapo oondjodhi dhaanyasha omanga dhi li petameko lela.

Ta ti iikolitha oshinima shi ya li kokule onkene oshe ya kwathela opo ya kale taya ningi nawa momaudhano gawo.

Okwa ti ngele aagundjuka oya hala oku ethapo iikolitha nena oyena okwi idhilika iinima mbyoka, yo taya ningi iinima mbyoka yina oshilonga ngaashi omaudhano, iilonga yosikola noku longa iilonga yomomagumbo mbyoka taya pewa kaakuluntu.

Tse ohatu idheula lwaali mesiku ongula nokomatango kehe esiku nongele twa zi komadhewo nena ohatu kala twa loloka nomuntu ohokotha owala oshoka olutu ohalu kala lwa pumbwa okuvululukwa na kapena ethimbo lyoku konga iikolitha.

“Onkene otandi mu indile kaleni kokule niikolitha niinima ayihe tayi vulu okuteyagulapo onakuyiwa yeni, longeni nuudhiginini simanekeni aakuluntu ne kaleni muna omalalakano moonkalamwenyo dheni, kehe gumwe kala wuna oshinakugwanithwa moshigwana,” Shikongo ta ti.

Eigidho lyaShikongo olya li lya kolekwa kOmunyekadhi gwoshitunda shUukwaluudhi Nandjala Taapopi sho ali a ningi ethindilemo nokufuula aanyasha noshitewo shoka ali a ngongele Nambala naShikongo ta ti ngele ino longa nuudhiginini nena mombala ito ka kundwamo wafa mbaka yaali.

Nkeyama gwoshitunda shUukwaludhi ngoka ali a nyanyukilwa aamati mbaka okwa li a popi niitya iifupi lela sho ati omwa ninga nawa aatekulu yandje omwaninga oshilumentu.

Na okwa li eya lombwele kutya na ya ye koshigunda opo eke yape okayuhwa, ashike sho ya yi koshigunda oya li ya pewa oonkwandambi mbali kehe gumwe ye.

LEAVE A REPLY

Please enter your comment!
Please enter your name here