Yamwe yiimangeleke mOshikoto

0
216

OMUTHIYA  – Omukonakoni gwiimbuluma ngoka eli wo Komisiona gOpevi moshitopolwa shaShikoto, Naomi Katjiua okwa tseyitha oshiwike shika kutya omaidhipago nomakwato koonkondo otaga londo unene moshitopolwa shoka.

Shino okwe shi popi konima sho opolisi moshitopolwa shaShikoto ya lopota omulumentu goomvula 55,  iidhipaga oshiwike shika. Oshiningwanima shika osha ningwa momukunda Onakankunzi moshitopolwa shaShikoto.

Olopota yopolisi ndjoka ya gandjwa  kuKomisiona gopevi  Katjiua otayi hokolola  kutya Lukas Nghikefelwa okwa adhika i imangeleka momuti pegumbo lye. Nghikefelwa ina thigapo nande omushangwa tagu ulike nenge tagu gandja omatompelo kutya oshike shemu fala moombale, nomakonakono gopolisi moshiningwanima shika otaga tsikile.

Moshiningwanima oshikwawo omukiintu goomvula 28 gomomukunda Omakango moshitopolwa osho tuu shoka okwa li a kwatwa koonkondo oontundumene dhetiyali.

Omulumentu goomvula 30 anuwa okwa li a yi mondunda yomukiintu ngoka nokwe mu kondjithile miihulo inaa yi uvathanwa.

Omufekelwa ngoka a za momukunda Onyuulae okwa mangwapo, nokuli momake gopolisi pethimbo ndika.  Nomakonakono gopolisi miiningwanima ayihe mbika otaga tsikile.

Katjiua okwa kumagidha aakwashigwana ya longele kumwe nopolisi mokulopota aantu mboka taya monika pomidhingoloko dhawo yena omainyengo taga limbilike.

Omolwa omaidhipago ngoka ga londa moshitopolwa Katjiua okwa indile aakwashigwana ya kale haya popi nenge ya tseyithile aapopepi yawo uuna ya adhika komaudhigu, yo ya konge ehungomwenyo manga inaaya kutha etokolo lyokuya moombale.

Ta ti ohashi kala omukundu omunene kaakwanezimo okwi itsa owala omupambele gwawo a endjelela momuti, po pwaana omushangwa tagu ulike kutya omuntu ngoka okwi imangelekele shike.  Okwa kumagidha  aayendi yuusiku ya hulithepo omikalo dhokukala puundingosho oowili dha pitilila, yo ya kale haya tokelwa momagumbo.

 

 

LEAVE A REPLY

Please enter your comment!
Please enter your name here