Kombinga ya shoka oThe Namibian yu uvite oku ningilwa

0
136

Osha li oshikumithi kashona, na ishewe otashi uvitha nayi , sho twa lesha omushangwa madhiladhilo goshifo shoThe Namibian Etitano lyazileko. Momushangwa ngoka oshifo shoka osha popi onga omuntu ta hala oku someya kombinga yeutho lyoKabinete lyomasiku gaziko  opo omatseitho taga ziilile miikondo yepangelo ga kale taga ningwa okupitila miikundaneki yoholomende.

O The Namibian pandjokonona oya kala noku popya shu ukilila oshinima shehepeko lyoonzo dhepangelo kutya oondyoka lyolela nenge oondyoka li wetike lyafa opo lili. Onkene eutho lyoKabinete ndika olya pumbwa oku  talikako ongeyamukulo lyakola komaindilo goshigwana okushonopeka elongitho nayi lyiiyemo yoshigwana.

Moku yamukula oohapu dhoThe Namibian na yalwe otwa hala okugandja eyamukulo lyakankamekwa moshinima shepangelo li longe nuundalapata  niimaliwa yoshigwana, no itaali ningi oshihakanwa shoku ulwa nayi osho wo okulukwa  omadhina hoka , ku mboka haye tu pe oombedhi yi etela ondjo.

O The Namibian oya kala omimvo odhindji noku gandja ombedhi kiikundaneki miikaha yoholomende mwa kwatelwa New Era anuwa sho mbika aluhe hayi ndopa okufuta shoka hayi longitha osho wo ihaayi vulu okulongitha iiyemo yayo okufuta shoka ya longitha shi thike pamwe naashoka yo ya likola nenge ootu oku likola oshimaliwa sha gwedhwapo[oprofita] miilonga yayo. Oshikwawo iikundaneki ya yama koholomende oya talika anuwa yi inekela unene mokukwathelwa koholomende pashimaliwa opo yi futile iilonga yayo. Oombedhi ndhika  otatu dhi taamba nomutima  aguhe.

Okuyeleka naashika  The Namibian ohi itanga nokutya ye oha longo nawa momalandithilo, ongoshifo oshikuluntu melaka lyoShiingilisa shesiku kehe moshilongo. Ihe itashi kala shapuka ngele tatu ti oshifo shika osheshi pondola okukala pombanda ngaaka konyala omimvo omilongo ndatu molwashoka osha kwatako oomilliona dhoondola odhindji mongeshefa yomatseyitho okuza kiikondo yoholomende.

Mwaashoka tashi vulu okutalika ongo epuko lyopamuhingo gomunawino Freud, The Namibian oya zimine kutya okululilwa kwayo neutho lyoKabinete  okupata opomba yoonzo, oshoka ndika tali ka guma ondjato yiiyemo yawo. Oya kambadhala oku zaleka omushangwa gwawo noshinima shomakankameno tameko giikundaneki osho wo uuwanawa woshigwana.

“Natu zimine,” osho ya shanga, “otundji yamwe yetu, unene tuu omahangano giikundaneki giithikamena otuna omaipulo kombinga yeutho lyoKabinete oku ukitha  omatseitho giipindi kiikundaneki miikaha yoholomende, oshoka ndika otali ka guma oondjato dhetu.”

Ezimino ndika olya gwana lela oku ulika kutya omaipulo gawo goshili ogo geni? Kagena sha nomakankameno nenge nomikanka nkalelo dhiikundaneki, ndele ngoka ogena sha nokuninga oshimaliwa nenge noprofita. Ndika olyo etompelo enene.

Aayamba nooyene yiikundaneki yopaumwene oya adhika ya yulwa noku kwatwako koku mona iimaliwa nuupu. Sho ngashingeyi einyengo lyiimaliwa mbika lya tulwa moshiponga , mbaka oya geyithwa noyu uvite nayi yafa omupika gwoshingangamithi shococaine uuvithwa nayi molwashoka omulandithi gwayo okwa thigapo oshilando.

Moku popya shu ukilila tse inatu indila tu ningilwe koombunda  moku kala tatu mono uuyelele wopashigwana, molwashoka uuyelele wa tya ngaaka owa pumbwa oku gandjwa  moshigwana komukalo kehe ngaashi tashi vulika. Euvaneko lyetu mwaashika oondika kutya  uuyelele mboka  nawu ulikwe  noku taandelekwa  wu li mondjila , naashika haaluhe sha simana kookuume mboka yomiikundaneki yopaumwene.

Tse otatu zimine kutya epangelo olya pumbwa okushunitha pevi elongitho nayi lyoshimaliwa. Nopethimbo ndika oshikondo kehe osho wo uuministeli kehe wa tegelelwa okwi imanga epaya , mwakwatelwa wo uundjolowele nelongo, omolwashike iikundaneki yina oku talelwa momakende ga yooloka?

Oshaninga omuhingondjigilile okulesha  momapandja mo mushangwa dhiladhilo gwoThe Namibian omimvo odhindji ngoka aluhe gwa tala kutya oyendji yomwaamboka ya hepa oye na uuvu wonkalo yoku kala yu uvite kutya oholomende oyi ya na ongunga oku ya ningila shika nenge shiyaka, okuza tuu kaailongi taya pula elongo itaali futilwa, okuya kaagundjuka mboka ya valelwa muundjendi pethimbo lyekondjelomanguluko, no taya kongo ekwatho okuza koholomende ndjoka aakuluntu yawo ya tilehile ombinzi yawo.

Ihe mpaka otuna oshinima shooyene yiikundaneki iiyamba taya pula kutya nayo oye na okupewa omatseyitho giipindi okuza koholomende  , shoka tashi yelekanithwa “neyambidhidho epu’ molupe lwomatseitho giipindi ihaaga hulu.

Nenge shika kashishi onkalo yoku itaala kutya nayo oye na okupewa, unene tuu sho mboka yeli nale nawa ni ishewe mbaka oya nkondopekwa?

Epangelo kali na oshinakugwanithwa oku kwatha uuwanawa wopaumwene wooyene yiikundaneki yopaumwene.

Shika oshiholelwa shepangelo tali kambadhala okushonopeka elongitho nayi , pethimbo iikondo ayihe tayi pulwa opo yi longe oshindji mokulongitha oshishona . Ndele iikundaneki yuukapitali mbika oyi mpwiyika ashike noku ninga oprifita okuyeleka naashoka yo taya ti onkambadhala okuthiminika oholomende yi shonopeke elongitho nayi lyiimaliwa.

Moku thiminika iikondo yepangelo  osho wo omahangano ga yama kepangelo opo ga longithe tango iikundaneki yepangelo mokutseyitha iitseyithwa, Okabinete oka yamukula komaindilo ngoka taga pula eshonopeko melongitho lyiiyemo niiniwe yalyo, na olya ukitha oonzo dhoshigwana mokukalekapo omalutu gopapangelo ngaashi osho shina okukala. Kashina omwiityo gwasha kepangelo ngele otali gandja oomilliona odhindji  kiikundaneki yopaumwene , omanga tali ndopa okuyambidhidha iikundaneki yalyo lyene okupitila momatseyitho. Shoka tashi fala mpoka kutya iikundaneki mbika ihaayi longo pamahupilo gokuninga oprofita okuyeleka naambyoka yopaumwene oyina aluhe oku pewa oshimaliwa tashi zi kepangelo shoka hashi zi miifendela. Etokolo oku lundululila omatseiyitho gepangelo kiikundaneki yoholomende okupitila mo New Era na NBC olina oku gandja iiyimati mbika 1) okushonopeka ekankameno lyiikundaneki yepangelo koku pewa iimaliwa kepangelo 2) oku koleka iikundaneki yepangelo opo yi futile shoka yo tayi longitha noku longa oshinakugwanithwa shayo nawa 3) noku shonopeka uundilo womatseitho gopambelewa moku gandja oondando dhili hwepo okuyeleka naandhoka dhoshitopolwa shopaumwene.

Okupata opomba yeyambidhidho epu  kiikundaneki yopaumwene otashi yi pe ompito opo yi ulikile kehe gumwe kutya yo ohayi longo nawa momalandithilo  na otayi vulu okuhupa  pwaana iiyemo tayi zi koholomende ngaashi shi li omukalo ndjigilile molupe lwoomilliona odhindji momatseitho.

Etokolo ndika lyoKabinete otali lalakanene okuhupitha omwaalu omunene goshimaliwa , moku lundululila  oonzo dhapumba  oku dhi gandja kiikundaneki yoshigwana ngaashi NBC na New Era, naandika otali popilwa lela no li na okupandulwa kwaayehe unene tuu kwaamboka, ya ninga egandjo lyoombedhi nuusama kelongitho nayi lyepangelo ongo olyo eithano lyawo.

 

LEAVE A REPLY

Please enter your comment!
Please enter your name here