Nakathila okonyala a sindane

0
169

 

Omudhengingonyo gwa Namibia ngoka a li ena etagameno oku imonena oshishani muudhenginyo kohi yehangano lyoongonyo lyo WBO okwa kanitha ompito ndjoka sho a sindika niitsa komukondjithi gwe omuRussia Etitano lyayi.

Jeremia Nakathila okwa li a tameke olugodhi lwe na Evgeny Chuprakov gwa Russia moshilando sha Ekaterinburg moRussia okukondjela epaya lyondjundo hayi ithanwa WBO intercontinental super feather weight.

Nakathila okwa tameke olugodhi  nduka a kondja omalugodhi omulongo nalimwe  no inaa dhengwa nando omu limwe lyomwaangaka nkene a tamekele okukondja ongo omudhengingonyo paithano.

Molugodhi nduka Nakathila okwa li a hokiwa kongundu yaa tali pethimbo ta kondjitha omuRussia nopomathimbo gamwe  osha li tashi monika shafa oye uuka nawa komeho momadhingoloko gotango golugodhi nduka.

Olugodhi nduka lwa kondjwa konyala shi thike pamwe okwa ndhindhilikwa kutya aadhengingonyo ayehe oyali yi itulamo mulo noka pwali nando ongonyo ya ndalapatelwa sho aamati mbaka ya taambathana dhopomeho. No pa ku tala Nakathila okwa li taka mona esindano lyopandjokonona, ndele nee okwa tameke a fa ta vululukwapo kashona momadhingoloko goku uka pehulilo molugodhi lwomadhingoloko omulongo nagaali.

Sho olugodhi lwa tsikile aadhengingonyo ayehe oya tameke oku ulika ya loloka, naashika osha konekiwa sho ya kala taya papatelathana noku undulathana. Ngaashi olundji shi shiwike momalugodhi gatya ngeyi, omuyenda opo wu sindane ouna ashike okupitila mokudhenga ongonyo ndjoka tayi gwithapo omukondjithi gwoye no itaa ka vula we okupenduka a tsikile olugodhi nduka.

Moku konga ongo yoonkondo andola opo a hatepo  omukondjithi gwe Nakathila okwa li a ponoka nokudhenga omukondjthi gwe nawa nelalakano oku mu tula pevi ando kaa thikamepo we. Naashika osha li sha nyanyudha  aanambelwa mboka a li eende pamwe nayo okuya koRussia.

Nakathila okwa li iihatapo lwaali ndele shika ine shi ninga andola sho  a dhengwa, ndele oosho omukondjithi gwe e mu papatele noku kambadhala okumu nwapo ondjumbu.

Kaatali mboka yaana kombinga hoka yagama olugodhi nduka olwali luli nawa naadhengingonyo koombinga adhihe oya li  ya kondjo nawa. Nakathila okwa li ku weti kutya otashi vulika oye ta ka sindana.Ihe sho nduka lweya pehulilo aagandji yiitsa ayehe oya gandja olugodhi lwa sindanwa kuChuprakov niitsa.

“Eeno otashi ulike kutya otwa uvithwa nayi  sho etokolo lyaa gandji yiitsa inaali gama komudhengingonyo gwetu.Ihe shika itashi teya Nakathila omukumo ndele oshe mu kumika opo monakuyiwa a longe nawa molugodhi talu landula.

 

 

LEAVE A REPLY

Please enter your comment!
Please enter your name here