Opolifi yaHangwena otai konaakona efyo lihefi lopaushitwe

0
242

OHANGWENA – Opolifi yoshitukulwa shaHangwena oya lopota efyo lihefi lopaushitwe lomunamido 19 Andreas Andreas Tuhafeni a fila mondama yokuyowela poLitu Hotel Guest House mEenhana onguloshi yEtitano ladjako.

Ouyelele wa yandjwa komunambelewa wopolifi Shisante Kaume Itumba okudilila koshitukulwa shaHangwena owa ti, nakufya Andreas ova li tava yoo navakwao voo tava nu omalodu nova tameka kuyowa lwopokati kotundi 18:00-19:00 lwaapo.

Nakusa Andreas mEenhana okwa shiivikila mo a dja kEpangwe koshikandjohoololo shaKongo moshitukulwa shaHangwena nokwa li ha foloma eedopi pongeshefa yokufoloma eedopi mEenhana.

Omunailonga poLitu Hotel and Guest House okwe litwa  muAndreas a fila momeva efimbo loufiku  potundi 03:00 keengula no ina shiiva kutya vakwao ova ya peni, onghee okwa lombwela opolifi yaEenhana kombinga yoshiponga eshi.

Mokufindikilwa koshipangelo mEenhana ondokotola oya koleka kutya, Andreas okwa xulifa nopolifi oye lipyakidila nekonaakono paife.

Oshiningwanima shikwawo okudiilila koshitukulwa shaHangwena,  opolifi otai konaakona oshibofa shonghedabala yedipao eshi omunamido 51 a ya sha Erastus Hafeni womido inadi tumbulwa poukamba pOnekwaya yokOushilo onguloshi yEtitano ladjako.

Itumba ta twikileko kutya, omufekelwa okwa longifa ombistoli yoNORINCO 9 mm moku yasha omunhu noku mu teya okwooko, na naku yashwa okwa findikilwa koshipangelo shepangelo kOshakati. Omufekelwa oku li modolongo yaHangwena nokwa holokele momangu yaMangestrata pOhangwena Omaandaha oshivike eshi.

LEAVE A REPLY

Please enter your comment!
Please enter your name here