Ya tokola okupainda ombelewa yongerki

0
159
Aagundjuka yomoshitayi shAuala taya longo ondjambi yokupainda etungo lyombelewa yoshikandjo shaPale olyomakaya ga yi.

 

EPALE –  Omolwa eipyakidhilo niilonga yokutunga ombelewa yoshikandjo Epale, aagundjuka moshitayingerki shaAuala oyali ya fala  ondjambi kombelewa yoshikandjo shika.

Omuwiliki gwaagundjuka moshitayi Esther Sakaria okwa yelitha kutya yo oyali yi imanga kumwe Olyomakaya ga ziko opo ya longe oshilongatumo kombelewa yelelo lyopamuthigululwakalo koshikandjo shoka.

Aagundjuka oyali ya landa oopainda niilongitho yokupainda, opo nayo ya wayimine iilonga yetungo ndyoka. “Oopainda ndhoka otwedhi landa niimaliwa yetu notwa tokola opo tu painde tse yene molwaashoka kuku Anneli Sakaria Mbumba ohetu kwatha olundji miinyangadhalwa yetu mbyoka hatu longekidha omathimbo nomathimbo,” Esther ta ti.

Okwa gwedhapo kutya shino oye shi ningi pamukalo gokwiiyamba, no ka yali ya tseyithile kuku Anneli kutya otaya ka painda etungo ndyoka lyombelewa. Aagundjuka oyali ya tameke ongula onene yOlyomakaya, molwaashoka oyali ya hala okugwanithapo oshinakugwanithwa shawo.

“Ngele tuna iinyangadhalwa kuku Anneli ohetu yambidhidha, no twa li twa hala tu mu kwathele pamikalo odhindji, thimbolimwe hatse owala tatu kala tatu pewa ihe natse ngele otuna natu gandje woo olupandu kwaamboka yetu kwatha no haya kala noku tu yambidhidha,’ ta gwedhapo.

Esther okwa pandula aagundjuka yomoshitayi Auala sho haya tula uukuni kumwe, no haya kundathana aluhe iinima ya pamba onkalamwenyo. Ta ti nonande ya unganeke iilonga mbyoka muule wethimbo efupi elela, aagundjuka oyendji oyali ya gongala nokulongapo iilonga mbyoka pombelewa ndjoka tayi adhika pEpale pOniipa.

Oshikandjo Epale oshi li mewiliko lyaKuku Anneli Sakaria, ngoka a hokolola kutya konima sho ali a langekwa oye elenga enene moshikandjo Epale oya li ya thaneke opo ya tunge ombelewa moka tamu kala tamu longelwa iinyangadhalwa yoshikandjo.

“Omikunda nomikunda odha kala tadhi longo ondjambi kombelewa ndjika, yo ya kwashilipaleke kutya oya pwa thilu okutungwa , yo tayi tameke okulongelwa. Ombelewa ndjika oya pwa ngaashingeyi no tatu ka kala twa tameka okulongelamo mbala iilonga yetu,” Kuku Anneli ati.

Kuku Anneli okwa pandula aagundjuka sho yi iyamba, ya longe ondjambi ndjoka ta ti kali eshi tegelela nande. Okwa kumike aagundjuka ya kale haya kutha ombinga miinyangadhalwa yoludhi kehe, yo ya longe muukumwe.

 

LEAVE A REPLY

Please enter your comment!
Please enter your name here