Minista Haufiku a konakonwa oHIV

0
207

Swakopmund- Minista gUundjolowele Nonkalo nawa, okwi ikonakonitha ye mwene kombinga yo HIV pethimbo lye egululo pambelewa lyoshigongi shopashigwana kombinga yoAIDS shoka sha hulile mesiku lyotango lyomwedhi nguka poShiwakopo.
Omundohotola Bernard Haufiku okwa ti oku ikonakonitha oHIV kasha li euliko lyowala ndele shika osho onkambadhala oku kumika aalumentu aaNamibia opo ye ki ikonakonithe itaa ya thiminikwa oku shi ninga.

“Ngame onda li nda hala okwiitula moongaku nenge monkalo yaaNamibia yalwe ndi tale kutya ohashi kutha shike opo omuntu a ye koku ikonakonitha.Eeno kashishi oshipu, kutya nee okungame ngoka ndili ondohotola. Onda li wo ndina uumbanda, ihe nando ongaaka osha li sha pumbiwa opo ndi konakonwe montaneho” osho ye a lombwele oshigongi.

Okwa dhimbulutha aalumentu aaNamibia mboka inaa yi ikonakonitha natango opo ya kuthe etokolo lyopaumwene neuvaneko kokuume kawo noku thikama ya ye, ye kiikonakonithe omanga ethimbo lyefudho ndika inaali thika.

“Ngele omuntu ino konakonwa wu tseye kutya owa thikama peni nena ito vulu wo okumona omayakulo gopaundjolowele gepango” omundohotola a dhimbulutha.

Haufiku okwa ti omathimbo gamwe aalumentu ihaya yi koku ikonakonitha ndele ohaya hogolola oku inekela konkalo yoHIV yokuume kawo unene ketompelo ndika kutya mbaka ohaya konakonwa uuna ya ya komathulo.

“Ohaya mono kutya omuthika gwawo kombinga yoHIV otagu uthwa kiizemo yekonakono lyomukulukadhi uuna a konakonwa ombuto sho eli metegelelo, sho shika inashi pumbwa okukala ngaaka.Aalumentu oye na okuya ya ka konakonwe yoyene, opo ya vule okumona epango ngele osha pumbiwa,” osho a ti.

Pahapu dhaMinista konyala aantu omayovi 18 000 ohayi ikonakonitha memanguluko omumvo kehe moNamibia. Shika otashi ti aantu 1400 momwedhi nenge aantu yaali mowili kehe ohayi ikonakonitha.

Oshigongi shotango shaNamibia shopashigwana kombinga yoAids osha li sha kalwa kaakwashigongi omathele 600 yaza oshilongo ashihe. Sho shika oshali kohi yoshipalanyolo “Muukumwe tse otatu hulithapo Aids moNamibia.”

Oshigongi shomasiku gatatu osha hulile mEtine oshiwike shika no sha li sha eta pamwe oondohotola, aanongononi osho wo aanamaithano guundjolowele ya za moshikondo shopaumwene nomwaashoka shoshigwana.

Aakwashigongi mbaka oya kundathana noku taambathana owino osho owo oya konakona nawa oonkambadhala dha Namibia moku kondjitha HIV/Aids, oonkambadhala oku yi keelela, omayakulo gokukonakonwa osho wo oku keelela opo aanona yaa taambe HIV okuza kooyina.

Haufiku okwa ti moshilongo omuna omahala ogendji goku konakona HIV/AIDS ngoka ga gandja ompito kaantu mboka yena HIV, kutya oomboka yeli kokule ya vule okumona epango nomayakulo agehe guukalinawa ngoka ya pumbwa.

“Itatu vulu okugandja omaipopilo. Otandi mu kumagidha amuhe , unene tuu aalumentu mu ka konakonwe nokutseya mpoka mwa thikama,” Minista a indile.

LEAVE A REPLY

Please enter your comment!
Please enter your name here