Uuyuni wa pulakene Geingob ta popi kombinga yaCastro

0
178

London- Omupresidente Hage Geingob mEtiyali okwa popi oshipopiwa she, shoka sha talika oshiwaanawa kwaanawe, okupopya komeho giigwana.Geingob okwa hokolola omuwiliki omweeti gwomalunduluko gwaCuba nakusa Fidel Castro ongo omulumentu ngoka a si komautho ge mwene

Castro, omunamimvo,90, okwa pita moonkambadhala odhindji dhomadhipago goshiyakela, ogendji gomwaangaka ga li ga longekidhwa kiilonga yomeholamo ya America hayi ithanwa CIA.

Olutu nduka lwoondaadhi olwa li lwa kambadhala ngaaka opo ando lu hulithepo enwethemo lyomuleli gwaKuba, unene tuu ndyoka lyuukommunisi.

Nonando uukommunisi muuyuni owa tekapo nenwethemo lyawo olya kana po sha landula a ehalakano po lyuukumwe waSoviet petameko lyethele mumvo 1990 , omakankameno gaCastro mwaashoka iitaala inaga tenguka.

Geingob, ngoka a li a kaleke manga pakathimbo etalelopo lye lyopambelewa koEuropa opo a vule oku kala pefumviko lya Castro moHavana okwa tanga omuwiliki omunene nguka omolwa ekankameno lye okukondjitha uukoloni muAfrica.

Geingob, ngoka wo naye eli omukondjelimanguluko, okwa mwene nkene omakwatho gaza koCuba ga etelwa noku pewa Swapo mekondjo lye okukondjitha South Afrika lyokakombo noludhi opamwe naayambidhidhi ye aakapitali.’

Omuwiliki gwa Namibian sho a popi mo Havana pethimbo lyefumviko ndyoka lya ulikwa nokutalwa kaatali omamilliona uuyuni auhe, okwa ti nomeso Castro natango oye omulongi omunene nolunza lwenwethemo.

“Emanguluko otali pula ingapi? Ingapi tayi pulwa okumangula oshigwana?
Oto gandja ingapi koshilongo shoka sheku kondjele manga yalwe yali omahewa gaatondi yoye?,” osho Geingob a pula a hala oku uva pethimbo a pewa ompito a popye.

“Pahapu dha Fidel, okukwathela memangululo lyaathindilwa kongudhi inaku ningwa omolwa okwi imonena uuwanawa wopamahupilo ndele naku kale ashike koku imonena eiyuvo lyokomwenyo lyaana enyenyeto’

“Ndika olyo etompelo li tu lithe mpaka. Tse otuli mpaka tuna eiyuvo lya yela okulaleka omulumentu ngoka uuthiga we kaa wu na mpoka tawu si notuli mpaka oku simaneka oshilongo shoka tse itaatu vulu oku shunitha oongunga dhasho,” Geingob a ti mokati komapandulo nehakelo lyomake lyaana ehulilo.

Omukokoli President Sam Nujoma, omuwiliki gwelunduluko mo Namibia, nOmuperesidente nale Hifikepunye Pohamba nayo oya li pefumviko mo Cuba.

Mboka wo ya li pefumviko oyo Amushangandjayi goSwapo Nangolo Mbumba, aanambelewa yaali yapewa omapapa gopakwiita metanga lyo People’s Liberation Army of Namibia (PLAN), ndyoka lya li ewawa lyopakwiita lyo Swapo osho wo luhupe lwomedhipago lyaantu oyendji moCassinga.

Aakwiita yaCuba oyo yotango ya thiki po Cassinga oku kwatha okuhupitha oontauki omayovi ndhoka dha li kohi yiiponokela yaSouth Africa lyuukoloni mesiku 4 Mai 1978.

“Aakwiita ya Cuba oya kanitha oomwenyo dhawo yamwe ya lemana omanga ya li taye tu popile” “ Geingob osho a lombwele uuyuni.
“Konima yoshiponokela shika, Cuba oye oshilongo shotango shoka sha gandja ehala lyoosikola nelongo kaanona mboka ya hupu miiponokela ya Cassinga konyala yeli [3 000] kontuntu yedhina Island of Youth.

Geingob okwa ti olugodhi olunene po Cuito Cuanavale, ndoka lwa simanekwa kaakondjelimanguluko nolu tondike kaapopili yokakombo noludhi, oshiholelwa oshikwawo sheitaalo lya Castro mokumangulula aathiminikwa, Geingob a dhimbulukwa.
“Kohi yomalombwelo ge, Cuba okwa tula egameno lyopashigwana she moshiponga opo a keelele omahomono ga South Africa lyokatongo.

Okudhengwa po Cuito Cuanavale okwa li taku ti edhengo lyaathiminikwa ayehe mUumbugantu wAfrika.Nesindano lyaSouth Africa lyuukwamuhoko okwa li tashi ti esindano lyokakombo noludhi nuupiyapika mboka yo ya li ya kalelapo”
Cuito Cuanavale okwa li ethimbo lyelunduluko mUumbugantu wAfrika unene tuu kuNamibia oshoka ndika olya fala metulo miilonga lyokatokolitho koRaata yEgameno yIigwana Hangano konomola 435.

“Shika osha fala memanguluko lya Namibia omumvo 1990. Ombinzi yaakwiita yaCuba eeno oshili otayi tekele emanguluko lyetu.’ Omuperesidende ati.

Ngaashi eshi ulike momutima gwe gwoku eta omalunduluko, Castro kali a hala sha okuza kutse kakele owala kokumangulula aantu yetu. Kali ena onkwa noonzo odhindji dhoshilongo shetu sha manguluka, nokwa li iitaala kutya aaKUBA ina ye ya gongele oshingoli nenge okawe , shoka ya hala osho owala okushunitha iipongolo yaakwiita yoshilongo shoka.

“Nonando otwa dhiminapo aatondi yetu, tse katuna esiku natu dhimbwe ookuume ketu. Aantu yaCuba oyo okuume ketu. Fidel okuume ketu. Nena naaluhe.”

Omakwatathano gopaudiplomate pokati ka Namibia na Cuba oga tsikile sigo omemanguluko sho Cuba a tumu oondohotola omathele, aapangi, naaniilonga yomoapoteka mboka sigo onena taya longo miipangelo nomuupangelo wa Namibi

“Natango otuna oshindji oku ilonga komulumentu nguka a mwenya nokwa si pamautho ge mwene,” Geingob a ti.
“Pethimbo ndika sho, opolitika muuyni inayi yelela we oyendji nawa, pethimbo omakwatathano taga hanaguka, pethimbo aantu taya kanitha omukumo, olyo ethimbo ndyoka twa pumbwa omadhiladhilo ga tsa ngaashi naanaa ngoka ga ulikwa konkalamwenyo ya Fidel Castro. Hasta la Victoria siempre!”

“Ombepo ye yelunduluko nayi tu hwameke atuhe opo tu tsikile okukondjitha uukoloni uupe noku kala muukumwe” “
Geingob okwa li a tegelelwa okuthika mo UK oshiwike shika okugwanithapo omalongekidho gokutsakanena na Queen Elizabeth, Prince Andrews, noMinista yaBritania yiipambele Africa niilongo yUuzilo wopokati,Tobias Ellwood, osho wo aapunguli .

LEAVE A REPLY

Please enter your comment!
Please enter your name here